Qazaxıstan prezidenti hökumətin istefasını qəbul edib

Qazaxıstan prezidenti Kasım-Jomart Tokayev ölkə hökumətinin istefasını qəbul edib.

1news.az xəbər verir ki, bu barədə dövlət başçısının mətbuat xidmətindən bildiriblər.

"Qazaxıstan Respublikası Hökumətinin istefası qəbul edilsin. Qazaxıstan Respublikasının Baş nazirinin səlahiyyətlərinin icrası müvəqqəti olaraq Əlixan Asxanoviç Smailova həvalə edilsin", - deyə dövlət başçısının fərmanında deyil.

Qeyd edilir ki, hökumət üzvləri hökumətin yeni tərkibi təsdiq olunana qədər öz vəzifələrini icra etməyə davam edəcəklər.

"Bu Fərman imzalandığı gündən qüvvəyə minir", - deyə qeyd edilir.

Qeyd edək ki, yanvarın 2-dən başlayaraq Qazaxıstanın Janaozen, Aktau və Manqistau vilayətlərində yanacağın iki dəfə bahalaşmasına qarşı etiraz aksiyaları keçirilir. Aksiya iştirakçıları maye qazın qiymətinin 120 təngədən 50-60 təngəyə salınmasını tələb edirlər. Hökumət komissiyası məsələ ilə bağlı etirazçılarla danışıq apardıqdan sonra Manqistauda qazın 1 litri 50 təngəyə endirilib.

Qazaxıstan prezidenti Kasım-Jomart Tokayev ölkənin Manqistau vilayəti və Almatı şəhərində fövqəladə vəziyyət rejiminin tətbiq edilməsi barədə qərarlar imzalayıb.

Fövqəladə vəziyyət rejimi vəziyyətin gərginləşməsi ilə əlaqədar ictimai təhlükəsizliyin təmin edilməsi, qanunçuluğun və asayişin bərpası, vətəndaşların hüquq və azadlıqlarının müdafiəsi məqsədilə tətbiq edilib.

Bildirilir ki, fövqəladə vəziyyət rejimi yerli vaxtla yanvarın 5-i saat 01:30-dan yanvarın 19-u saat 00:00-a qədər qüvvədə olacaq.

1news.az