Gabrielius Landsbergis: Litva həmişə Azərbaycanın ərazi bütövlüyünü dəstəkləyib – FOTO
Milli Məclisin sədri Sahibə Qafarova Litva Respublikasına rəsmi səfəri çərçivəsində bu ölkənin xarici işlər naziri Gabrielius Landsbergislə görüşüb.
Parlamentin mətbuat və ictimaiyyətlə əlaqələr şöbəsindən 1news.az-a bildirilib ki, Azərbaycan Milli Məclisinin rəhbərini və onun başçılıq etdiyi nümayəndə heyətini səmimiyyətlə salamlayan Gabrielius Landsbergis ölkələrimiz arasında yaxşı əlaqələrin olduğunu deyib. O, ölkəmizə iki dəfə səfər etdiyini xatırladaraq, bu səfərlərdən məmnunluğunu bildirib. Litva XİN rəhbəri ölkəsinin Azərbaycanla uğurlu birgə layihələr həyata keçirdiyini söyləyib. Gabrielius Landsbergis Litvanın həmişə Azərbaycanın ərazi bütövlüyünü dəstəklədiyini qeyd edib.
Göstərilən yüksək qonaqpərvərliyə görə təşəkkürünü bildirən Milli Məclisin sədri Sahibə Qafarova bu səfərin onun parlamentin spikeri kimi Litvaya ilk səfəri olduğunu deyib. O, səfərin Litva Respublikası Seyminin sədri Viktoriya Çmilite Nielsenin dəvəti ilə reallaşdığını diqqətə çatdırıb. Milli Məclisin sədri səfər çərçivəsində keçirdiyi görüşlərdən məmnunluğunu ifadə edib. Bu səfərin ikitərəfli əlaqələrin daha da inkişafına töhfə verəcəyinə, Azərbaycan ilə Litva arasında dostluq və əməkdaşlığın bundan sonra da uğurla inkişaf edəcəyinə ümidvar olduğunu bildirib.
Azərbaycan və Litvanın dost ölkələr olduğunu deyən parlamentin sədri bildirib ki, iki ölkə arasında münasibətlər bir çox sahələri əhatə etməklə xalqlarımızın maraqlarına cavab verir. S.Qafarova bu gün münasibətlərimizin daha da dərinləşdirilməsi üçün geniş imkanların olduğunu diqqətə çatdırıb. O, bu kontekstdə qanunverici orqanlar arasında əlaqələrin daha da dərinləşdirilməsinin əhəmiyyətini vurğulayıb.
Litvanın Avropa İttifaqına (Aİ) üzvlüyünü nəzərə alaraq, Azərbaycan ilə Aİ arasında əlaqələr haqqında danışan Milli Məclisin sədri qeyd edib ki, ölkəmiz bu qurumla əməkdaşlığa böyük əhəmiyyət verir. Sahibə Qafarova Avropa İttifaqı Şurasının Prezidenti Şarl Mişelin 2021-ci ilin iyulunda Azərbaycana səfərini və Prezident İlham Əliyevin Avropa İttifaqının Brüsseldə keçirilən 6-cı Şərq Tərəfdaşlığı Sammitində iştirakını xatırladıb. Onun sözlərinə görə, Aİ ilə enerji sahəsində əməkdaşlıq da böyük əhəmiyyət kəsb edir. Azərbaycan neftlə yanaşı, həm də Cənub Qaz Dəhlizi vasitəsilə Avropanın etibarlı qaz tədarükçüsünə çevrilib. Bu, Avropanın enerji təhlükəsizliyinə mühüm töhfədir.
2020-ci ildə 44 günlük Vətən müharibəsində Azərbaycanın tarixi Qələbəsindən sonra regionda yeni yaranmış reallıqlar barədə də danışan Milli Məclisin sədri deyib ki, artıq münaqişə tarixdə qalıb. Azərbaycan öz imkanları hesabına işğaldan azad edilmiş ərazilərdə geniş quruculuq və bərpa işləri həyata keçirir. Azərbaycan regionda daim sülh və təhlükəsizliyin təmin olunmasını istəyir və Ermənistana bir-birinin suverenliyinin, ərazi bütövlüyünün qarşılıqlı tanınması, sərhədlərin delimitasiyası və demarkasiyası prosesinə başlanması, regionda bütün kommunikasiyaların bərpası və münasibətlərin normallaşmasına gətirib çıxaracaq sülh sazişinin imzalanması ilə bağlı təkliflər verib. Ermənistan regionda yeni reallığı dərk etməli və sülh və sabitliyin bərqərar olması istiqamətində üzərinə düşən vəzifələri yerinə yetirməlidir.
Milli Məclisin sədri ölkəmizin həyata keçirdiyi layihələr və mövcud olan investisiya imkanları barədə məlumat verərək deyib ki, Ələt Azad İqtisadi Zonasına, işğaldan azad edilmiş ərazilərimizdə yaradılan Araz Vadisi İqtisadi Zonasına, Ağdam Sənaye Parkına, aqroparklara, informasiya-kommunikasiya texnologiyaları və bərpa olunan enerji sahələrinə investisiya qoyuluşu üçün çox gözəl imkanlar mövcuddur. Sahibə Qafarova bildirib ki, Azərbaycan Litva şirkətlərini də ölkəmizdə həyata keçirilən layihələrə investisiya yatırmağa dəvət edir. Milli Məclisin sədri Zəngəzur dəhlizinin strateji əhəmiyyətindən də danışaraq qeyd edib ki, bu dəhlizin açılması, nəinki region üçün, o cümlədən Avropa İttifaqına üzv olan ölkələr üçün də yeni imkanlar yaradacaq.
Görüşdə qarşılıqlı maraq doğuran digər məsələlər ətrafında da fikir mübadiləsi aparılıb.
