Prezidentin təyin etdiyi yeni icra başçıları kimdir? - DOSYE - YENİLƏNİB
Xəbər verdiyimiz kimi, Prezident İlham Əliyevin sərəncamı ilə Nərimanov, Nizami və Kürdəmir rayonlarına yeni icra başçısı təyin edilib.
1news.az-ın Qaynarinfo-ya istinadla verdiyi xəbərə görə, yeni icra başçıları ilə bağlı məlumatları təqdim edir:
Nərimanov Rayon İcra Hakimiyyətinin yeni icra başçsı Elgin Həbibullayev Şirin oğlu
Elgin Həbibullayev 7 aprel 1977-ci ildə Bakı şəhərində anadan olub. Azərbaycan Dövlət İqtisad Universitetinin Maliyyə kredit fakültəsini fərqlənmə diplomu ilə bitirib. Harvard Biznes Məktəbinin idarəetmə proqramını bitirib.
Elgin Həbibullayev son təyinatadək Bakı Şəhər İcra Hakimiyyəti başçısı Aparatının rəhbəri vəzifəsində çalışıb. Daha öncə Sumqayıt Şəhər İcra Hakimiyyəti başçısının müavini vəzifəsində və icra hakimiyyəti strukturlarında müxtəlif məsul vəzifələrdə çalışmışdır.
Ailəlidir, iki övladı var.
Bakı şəhəri Nizami Rayon İcra Hakimiyyətinin yeni icra başçısı Coşqun Adil oğlu Cəbrayılov
Nizami rayonu İcra Hakimiyyətinin başçısı təyin olunan Coşqun Adil оğlu Cəbrayılov bu vəzifəyə təyin olunan qədər Bakı Şəhər İcra Hakimiyyətinin Ərazi idarəetmə və yerli özünüidaretmə orqanları ilə iş şöbəsinin müdiri olub. O, bu vəzifəyə 2018-ci ilin sentyabrında təyin olunmuşdu.
Daha əvvəl isə Coşqun Cəbrayılov Səbail Rayon İcra Hakimiyyətinin Ərazi idarəetmə və yerli özünüidarəetmə orqanları ilə iş şöbəsinin müdiri olub. O, daha əvvəllər Sumqayıt Şəhər İcra Hakimiyyətində də bu vəzifəni icra edib.
Kürdəmir Rayon İcra Hakimiyyətinin yeni başçısı Elxan Oqtay oğlu İbrahimov
Bu vəzifəsindən əvvəl Şamaxı rayon İcra başçısının müavini - Sosial-iqtisadi inkişafın təhlili və proqnozlaşdırılması şöbəsinin müdiri olub. Azərbaycan Kooperasiya Universitetində təhsil alan Elxan İbrahimov sonradan təhsilini İsveçin Stokholm İqtisadiyyat Məktəbində davam etdirib, rus və ingilis dillərində sərbəst danışır. Əvvəllər ölkəmizdə bir neçə holdinqdə iqtisadiyyat və maliyyə işləri üzrə rəhbər vəzifələrdə çalışıb. Ailəlidir, 3 övladı var.
Mövzu ilə əlaqədar oxuyun:
Nərimanov və Nizami rayonlarına yeni icra başçıları təyin olunub
Prezident Kürdəmirə yeni icra başçısı təyin edib
