“Azərbaycan tərəfinin qazı kəsməsi ilə bağlı məlumatlar feykdir”

“Rusiya sülhməramlılarının müvəqqəti nəzarəti altında olan ərazilərdə təbii qazın Azərbaycan tərəfindən kəsilməsi ilə bağlı iddialara ötən gün "Azəriqaz" tərəfindən açıqlama verildi”.

1news.az xəbər verir ki, bunu jurnalistlərə açıqlamasında xarici işlər naziri Ceyhun Bayramov bildirib.
“Açıqlamada qeyd olundu ki, həmin ərazilərdə qazın təchizatına məsul olan Azərbaycan tərəfi deyil. Yəni qazı Azərbaycanın kəsməsi ilə bağlı yayılan məlumatlar feykdir. Ancaq belə bir problem varsa, araşdırılmalıdır” .

Nazir bildirib ki, hava şəraiti sərt keçən digər ərazilərimizdə də qaz təchizatı ilə bağlı problem yaşanıb.
“Bu, yeni hal deyil. Əgər Qarabağda yerli əhali ilə dövlət qurumları arasında əlaqə olsaydı, məsələ vaxtında həll olunardı. Yerli erməni əhalinin başında duranlar yalan informasiyalar yayırlar. Özləri süni şəkildə ünsiyyətdən yayınırlar. İndi dramatizmi artırmaq üçün Azərbaycan tərəfi ilə ünsiyyətdən yayınırlar”, - deyə nazir vurğulayıb.