1news.az

KOB-ların məhsul və xidmətləri “Baku Build 2019” Sərgisində – FOTO

22 Oktyabr saat 15:18 ~ 3 dəqiqəlik oxu 86
KOB-ların məhsul və xidmətləri “Baku Build 2019” Sərgisində – FOTO

Azərbaycan Respublikasının Kiçik və Orta Biznesin İnkişafı Agentliyinin dəstəyi ilə inşaat sektorunda fəaliyyət göstərən KOB-lar bu gün Bakı Ekspo Mərkəzində öz işinə başlamış 25-ci Azərbaycan Beynəlxalq İnşaat ("Baku Build" 2019) Sərgisində iştirak ediblər.

1news.az-a Azərbaycan Respublikasının Kiçik və Orta Biznesin İnkişafı Agentliyindən verilən məlumata əsasən, sərgidə KOB-lar üçün ayrılmış xüsusi stenddə müxtəlif inşaat materialları, mühəndislik xidmətləri, istilik sistemləri, avtomatlaşdırılmış qapılar, ağıllı ev, təhlükəsizlik sistemləri, landşaft memarlığı və s. məhsul və xidmətlər nümayiş olunur. KOBİA həmçinin, "Baku Build 2019” Sərgisinə dəstək göstərən qurumlar sırasındadır.

Sərginin açılış mərasimində çıxış edən İqtisadiyyat nazirinin müavini Niyazi Səfərov ölkəmizdə sənayenin, o cümlədən tikinti sektorunun inkişafı, bu sahəyə göstərilən dövlət dəstəyi, eləcə də əldə olunmuş müsbət dinamika barədə məlumat verib, iqtisadiyyatın müxtəlif sahələrində əldə olunan uğurların nümayiş olunması baxımından sərgilərin əhəmiyyətini diqqətə çatdırıb. Qeyd olunub ki, 1995-ci ildən keçirilən sərgidə 35 ölkədən 5000-dən çox şirkət öz məhsullarını və qabaqcıl texnologiyalarını nümayiş etdirib. Bu il də ənənəvi olaraq İqtisadiyyat Nazirliyi, Kiçik və Orta Biznesin İnkişafı Agentliyi, Azərbaycanda İxracın və İnvestisiyaların Təşviqi Fondu sərgiyə dəstək göstərir.

KOBİA-nın İdarə Heyətinin sədri Orxan Məmmədov Agentliyin müxtəlif mexanizmlər çərçivəsində KOB-lara dəstək göstərdiyini, belə dəstək tədbirlərindən birinin də sahibkarların ixtisaslaşmış sərgilərdə iştirakının təmin edilməsi olduğunu qeyd edib. Bildirilib ki, “Baku Build” Sərgisində də KOBİA öz stendi ilə iştirak edir və burada inşaat sahəsində fəaliyyət göstərən KOB-ların məhsul və xidmətləri nümayiş olunur. Bu dəstəyin əsas məqsədi KOB-ların öz məhsul və xidmətlərini geniş auditoriyaya təqdim etməsinə, satış imkanlarını genişləndirməsinə, biznes əlaqələri qurmasına dəstək olmaqdır.

“Baku Build 2019” Sərgisi ilə eyni platformada Xəzər Beynəlxalq Mebel, İnteryer və Dizayn Sərgisi (“Caspian MebelExpo 2019”), 12-ci Xəzər Beynəlxalq Mühafizə, Təhlükəsizlik və Xilasetmə Vasitələri Sərgisi (“Securex Caspian 2019”) və 12-ci Beynəlxalq “İstilik, Havalandırma, Kondisionerləşdirmə, Su təchizatı, Santexnika və Üzgüçülük Hovuzu Sərgisi “Aquatherm Baku 2019” keçirilir.  Sərgilər oktyabrın 25-dək davam edəcəkdir.

Qeyd: KOBİA mikro və kiçik sahibkarların ölkəmizdə keçirilən müxtəlif beynəlxalq sərgi və festivallarda iştirakına dəstək göstərir. 2018-ci ildən etibarən startaplar, mikro və kiçik sahibkarlar KOBİA-nın dəstəyi ilə Telekommunikasiya, İnnovasiya və Yüksək Texnologiyalar, Qida Sənayesi, Hədiyyələr və Promo Məhsulları, Təhsil və Karyera sərgilərində, "Organic Food Festivalı 2019"da və s. iştirak ediblər. KOBİA tərəfindən mikro və kiçik sahibkarlıq subyektlərinin müxtəlif sərgi və digər tədbirlərdə iştirakına dəstək davam etdirləcəkdir.

S.Xankişiyeva

 

OXUCULARIN SEÇİMİ
REDAKSİYANIN SEÇİMİ
İqtisadiyyat BÖLMƏSİNDƏN DİQƏR XƏBƏRLƏR

SON XƏBƏRLƏR

yuxarı
Materiallardan istifadə edərkən sayta mütləq istinad olunmalıdır.

© Copyright 2007-2019 "The First News" İnformasiya Agentliyi,,
Bütün hüquqlar qorunur
entonee.net