İsrail Türkiyəyə qaz tədarük etməyə hazır olduğunu bəyan edib
Azərbaycan və Qətərdən sonra Türkiyənin dəstəyinə İsrail də qoşulub.
1news.az “Huriyyet” qəzetinə istinad edərək xəbər verir ki, bunu parlamentin iqtisadi komissiyasında çıxışı zamanı İsrailin baş naziri Benyamin Netanyahu söyləyib. Onun sözlərinə görə, hazırda bu məsələ ilə bağlı məsləhətləşmələr aparılır:
"Biz bu məsələnin iki ölkə arasında münasibətlərin düzəlməsinə şərait yaradacağına ümid edirik. İsrail həmçinin Yunanıstan, İordaniya, Misir və Kiprə də qaz satmaqda maraqlıdır".
İsrailin hazırda Aralıq dənizində istifadəyə verdiyi iki ən böyük qaz yatağı var. Bunlar "Tamar" və "Leviafan" yataqlarıdır. Bu yataqların işlədilməsini isə ABŞ-ın "Nobl Enerji" və İsrailin "Delek Qrup" şirkətləri həyata keçirir.
Qeyd edək ki, Türkiyə-Rusiya münasibətlərinin pozulmasından sonra Moskva "Türk axını" layihəsini dayandırdığını bəyan edib. Lakin Rusiya Türkiyəyə qaz nəqlini dayandırmayıb. Türkiyə tərəfi bu məsələnin iki ölkə arasında imzalanan müqaviləəsasında təmin ediləcəyini bildirib. Rusiyadan sonra Türkiyənin ən çox qaz aldığı ölkə olan İran isə Ankaraya qaz nəqlini qısa müddətlik 50%-ə endirib. Rəsmi Tehran buna əsas səbəb kimi ölkədə sərt şaxtaların olmasını göstərib.
1news.az
