Ermənistan Müdafiə Nazirliyi: “Atəşkəs rejimi artıq yoxdur. Bu müharibədir”

Qoşunların təmas xəttindəki vəziyyəti ancaq müharibə kimi xarakterizə etmək olar”- deyə, Ermənistan Müdafiə Nazirliyinin mətbuat katibi Artsrun Ovannisyan  jurnalistlərə bildirib.

“Artıq heç kim üçün sirr deyil və bütün ekspert və analitiklər tərəfindən hazırkı vəziyyət müharibə kimi qiymətləndirilir. Bu artıq müharibədir, ona görə də atəşkəsin pozulmasından danışmaq olmaz. Cünki atəşkəs artıq yoxdur”- “Novosti Armeniya” saytı Ovannisyandan sitat gətirir.

Xatırladaq ki, Azərbaycanın 20 faiz ərazisi- Dağlıq Qarabağ və ona yaxın olan 7 rayon, Ermənistan silahlı qüvvələrinin işğalı altındadır.

Erməni silahlı qüvvələrinin Azərbaycan ərazilərindən çıxarılması haqqında BMT Təhlükəsizlik Şurası  4 qətnamə  qəbul etdiyinə baxmayaraq, erməni tərəfi hələ də, buna məhəl qoymur.

Cəbhə xəbərlərindən görünür ki, 20 il ərzində erməni silahlıları beynəlxalq ictimaiyyət tərəfindən Azərbaycanın tarixi torpaqları kimi tanınan əraziləri işğal altında saxlayır və 1994-cü ildə qəbul olunmuş atəşkəs rejimini hər gün pozurlar. Erməni silahlı qüvvələrinin təxribatı nəticəsində, nəinki, Azərbaycan ordusunun əsgərləri, həm də kəndlərdə yaşayan dinc sakinlər həlak olur.

Azərbaycan ordusu erməni işğalçılarına qəti cavab atəşi ilə reaksiya verir ki, bu da onlarda  ciddi itkilərlə nəticələnir.   

Azərbaycan Prezidenti və XİN dəfələrlə bəyan edib ki, cəbhə xəttində qarşıdurmanın yaranması məhz erməni işğalçılarının Azərbaycana məxsus əraziləri zəbt etməsidir.

 Azərbaycan Müdafiə Nazirirliyinin rəhbəri də öz növbəsində qeyd edib ki, erməni qüvvələrinin təxribatçı çıxışı və atəşkəsi pozma halı qəti cavab atəşi ilə susdurulacaq. Məhz bu fakt son zamanlar ciddi itkilərlə üzləşən erməni tərəfinin narahatlığına səbəb olub.

1news.az