Bahar Muradova: “Azərbaycan ABŞ-la münasibətləri birmənalı olaraq kəsmək niyyətində deyil”
“Azərbaycan ABŞ-la münasibətləri birmənalı olaraq kəsmək niyyətində deyil. Kimsə bunu bizdən gözləməsin. Sadəcə müəyyən addımlara qarşı adekvat addımların atılması məntiqlidir”.
1news.az-ın verdiyi xəbərə görə, bunu jurnalistlərə açıqlamasında Milli Məclisin sədr müavini Bahar Muradovadeyib.
Eyni zamanda, B.Muradova əlavə edib ki, Azərbaycanla ABŞ arasında münasibətlərin yaxşı olması tək Azərbaycanın yox, həm də ABŞ-ın, amerika xalqının marağındadır:
“Azərbaycanın özünün strateji tərəfdaşları ilə qarşılıqlı münasibətdə olduğu bütün ölkə və təşkilatlarla qurduğu münasibətlərə adekvat münasibəti də gözləməkdə haqqı var. Bu həm ABŞ-a, həm də digər dövlətlərə aiddir. Hesab edirəm ki, qarşılıqlı münasibətlər qarşılıqlı hörmətə və bir-birinin maraqlarını nəzərə almağa yönəlməlidir. Yox, əgər bir tərəf öz marağını hər şeydən üstün tutub yalnız diqtə yolunu tutacaqsa, əlbəttə ki, Azərbaycan bunu qəbul etməyəcək və öz mövqeyini qarşı tərəfin diqqətinə çatdıracaq.
Hazırda Azərbaycan ictimaiyyəti, siyasi dairələrimiz bu barədə mövqeyimizi açıq şəkildə ifadə edirlər. Hesab edirəm ki, dostlar, strateji müttəfiqlər arasında münasibətlər açıq və səmimi olmalıdır ki, hər kəs bir-birinin mövqeyini nəzərə ala bilsin. Azərbaycan ABŞ-la münasibətləri birmənalı olaraq kəsmək niyyətində deyil. Kimsə bunu bizdən gözləməsin. Sadəcə müəyyən addımlara qarşı adekvat addımların atılması məntiqlidir.
Səninlə hansı dildə damışırlarsa o dili anladığını göstərməlisən. Azərbaycanla ABŞ arasında münasibətlərin yaxşı olması tək Azərbaycanın yox, həm də ABŞ-ın, amerika xalqının marağındadır. Azərbaycanın regiondakı mövqeyi, onun imkanları və verə biləcəyi töhfə yalnız bizə xidmət etmir. Qarşı tərəf də bunu anlamalıdır.
Yeni qətnamə barədə ən müxtəlif fikirlər səsləndirilir. İctimaiyyət, millət vəkilləri, siyasətçilər münasibətləri normal məcraya yönəltmək üçün müəyyən fikirlər səsləndirir, konkret layihələr təklif edirlər. Düşünürəm ki, hansı addımın atılması yalnız müzakirələr nəticəsində müəyyən oluna bilər”, - B.Muradova bildirib.
Qeyd edək ki, deputat Rövşən Rzayev “ABŞ-da insan hüquqlarının vəziyyəti haqqında” adlı qanun layihəsi hazırlayaraq Milli Məclisə təqdim edib.
1news.az
