Bakıda “Yeni hədəflər naminə” mövzusunda konfrans keçirilib
Bakıda Yeni Azərbaycan Partiyasının (YAP) təşkilatçılığı ilə “Yeni hədəflər naminə” mövzusunda konfrans keçirilib.
1news.az-ın məlumatına görə, ilin yekunlarına həsr olunan konfransda dövlət və hökumət rəsmiləri, millət vəkilləri, ictimaiyyətin nümayəndələri iştirak ediblər.
Baş nazirin müavini, Yeni Azərbaycan Partiyası sədrinin müavini-icra katibi Əli Əhmədov konfransı açaraq başa çatmaqda olan bu ildə ölkəmizin həyatında bir çox mühüm hadisələrin olduğunu deyib:
“2015-ci ildə çox əhəmiyyətli hadisələr baş verib. Bunlardan biri bu il noyabrın 1-də keçirilmiş prezident seçkiləridir. YAP bu seçkilərdə qalib gəldi. Bu qələbənin əsasında xalqın Yeni Azərbaycan Partiyasının sədri, Prezident İlham Əliyevə sevgisi, onun siyasətini dəstəkləməsi, dövlətimizin başçısının cəmiyyətdə yüksək siyasi reytinqi dayanır. Təbii ki, burada YAP-ın namizədlərinin hər birinin siyasi nüfuzunun da öz təsiri var”.
Digər mühüm hadisə kimi Avropa Oyunlarının keçirilməsini qeyd edən Ə.Əhmədov bildirib ki, Oyunların ilk dəfə ölkəmizdə keçirilməsi Azərbaycanın böyük potensialını dünyaya təqdim etməyə imkan verdi.
Azərbaycan Milli Elmlər Akademiyasının prezidenti, akademik Akif Əlizadə çıxış edərək bildirib ki, Prezident İlham Əliyevin on ildən artıq müddətdə həyata keçirdiyi ardıcıl və məqsədyönlü siyasət nəticəsində Azərbaycanın beynəlxalq aləmdə strateji mövqeləri möhkəmlənib, ölkəmiz regionun lider dövlətinə çevrilib:
“Bu gün hegemon dövlətlər dünyanın inzibati-siyasi xəritəsini dəyişməyə can atırlar. Belə bir şəraitdə Azərbaycan öz dövlət siyasətinin başlıca hədəflərini müəyyənləşdirməklə yanaşı, düzgün siyasəti nəticəsində sanki bir sabitlik adasına çevrilib”.
Ölkəmizdə elmin inkişafına göstərilən diqqət və qayğıdan söz açan A.Əlizadə elm adamlarını ölkəmizdə ərzaq təhlükəsizliyinin təmin edilməsinə öz töhfələrini verməyə çağırıb.
Kənd təsərrüfatı naziri Heydər Əsədov çıxışında son iki ildə aqrar sahədə görülən işlərdən və əldə olunan nailiyyətlərdən danışıb. Bildirib ki, son iki ildə bu sahədə görülən işlərin əsas hədəfini həmin sektora dövlət dəstəyinin artırılması ilə xarakterizə etmək olar.
1news.az
