XİN: “Qarabağda gərginliyin səbəbi – erməni işğalçı qüvvələridir” – VİDEO
Dağlıq Qarabağda gərginliyin artması və atəşkəs rejiminin pozulması Azərbaycanın işğal olunmuş ərazilərində qanunsuz olaraq Ermənistanın işğalçı qüvvələrinin mövcud olması ilə əlaqədardır.
Bu haqda Azərbaycanın Xarici İşlər Nazirliyinin (XİN) mətbuat xidmətinin rəhbəri Hikmət Hacıyev İsrailin “İ24News” telekanalının canlı efirində çıxış edib və cəbhədə yaranmış gərginlik və münaqişənin həlli ilə əlaqədar sualları cavablandırıb.
Hikmət Hacıyev qeyd edib ki, Ermənistanın Azərbaycana qarşı təcavüz və işğalı və müharibə 20 ildən artıq bir dövrdə davam edir. İlk növbədə bu suala cavab verməliyik ki, nəyə görə gərginlik və ya atəşkəsin pozulması baş verir? Çünki, Azərbaycanın işğal olunmuş ərazilərində qanunsuz olaraq, Ermənistanın işğalçı qüvvələri mövcuddur.
Ermənistan eyni zamanda Azərbaycanın işğal olunmuş ərazilərində etnik təmizləmə törədib və bunun nəticəsində bir milyondan artıq azərbaycanlı qaçqın və məcburi köçkün vəziyyətinə düşüb. Təcrübə göstərir ki, prezidentlər səviyyəsində görüş keçirilərkən Ermənistan təxribatçı addımlara əl atır və qəsdən vəziyyəti gərginləşdirir. 19 dekabr tarixində Berndə ATƏT Minsk qrupunun həmsədrlərinin vasitəçiliyi ilə keçirilmiş prezidentlərin görüşündən sonra da Ermənistan bu kimi təxribatlara əl atdı. Hal-hazırda danışıqlarda münaqişənin həlli ilə əlaqədar konkret təkliflər vardır.
Ermənistanın bu əməllərlə əsl məqsədi münaqişənin əsasını təşkil edən işğal və təcavüzdən yayınmaq və münaqişənin həllinə imkan verməməkdən ibarətdir.
Atəşkəs rejimi əslində nisbi xarakter daşıyır. Atəşkəs münaqişənin nəticələrinin, işğal və təcavüzün aradan qaldırılması və münaqişənin həlli üçün əlverişli imkan və mühit yarada bilərdi. Əgər kimlərsə nə vaxtsa iddia edirdilərsə “bu münaqişə dondurulmuşdur” onlar yanılırlar. Ermənistan öz qoşunlarını işğal olunmuş Azərbaycan ərazilərindən çıxardıqdan sonra münaqişənin həlli tezliklə mümkün ola bilər.
