Növbəti təxribat: “Life News”-un Azərbaycanın ön cəbhədəki regionlarının vəziyyəti haqqında yalanı – VİDEO
Rusiyanın “Life News” telekanalı öz reportajında Azərbaycanın ön cəbhədə yerləşən Tərtər rayonu haqqında həqiqətə uyğun olmayan, təxribat məlumatlar yayımlayıb.
Müxbir bəyan edib ki, sakinlər təlaş içindədir və kütləvi surətsdə öz evlərini tərk edirlər.
Tərtərin girişində 15 maşın saxlanan avtodayanacaqda dayanan müxbir bildirir ki, rayondan sakinlərbütün ailə ilə buraya gəlir, öz maşınlarında yatır və evlərinə qayıtmağa qorxurlar. Guya ki, çoxları başqa şəhərlərə gedirlər.
Lakin kadrlardan göründüyü kimi, demək olar ki, maşınların çoxu boşdur.
Sakinlərdən birindən alınan müsahibə düzgün tərcümə olunmayıb. Orjinalda kişinin sözləri Azərbaycan dilində bu cürdür:
“Torpaqlarımız ermənilər tərəfindən işğal edilib. Hazırda biz müharibə şəraitində yaşayırıq. Hər gün atışma olur. Şəhidlərimiz olub. Hazırda biz, onların dəfn mərasimindən qayıdırıq”.
Telekanal həmin kişinin sözlərini rus dilinə bu cür tərcümə edib: “Burada bir neçə ailə var, bunlar bizim qonşularımızdır. Axşam tərəfi burada daha çox maşın olacaq. Bu müharibə bizə lazım deyil, bütün günü atışma gedir”.
Qeyd edək ki, şənbə günü Dağlıq Qarabağ münaqişəsi zonasında atışmadan dərhal sonra Tərtər Rayon İcra Hakimiyyətinin başçısı Müstəqim Məmmədov bildirib ki, kəndlərin boşaldılması ilə bağlı yayılan informasiyalar yanlışdır:
“Rayonda vəziyyət sabitdir, təlaşa əsas yoxdur. İnsanlar adi qaydada işləyir, sakinlər hamısı yerindədir, vəziyyətə nəzarət olunur”.
Analoji məlumatı Tərtərdə olan fotomüxbir Tofiq Babayev də bildirib.
Xatırladaq ki, aprelin 1-dən 2-nə keçən gecə erməni silahlı qüvvələri Azərbaycanın yaşayış məntəqələrini güclü artilleriyalardan atəşə məruz qoyub.
Azərbaycan Ordusunun qısa müddətdə həyata keçirilən sürətli əks-həmlə zamanı erməni birləşmələrinin uzun illərdən bəri mühəndis-istehkam baxımından möhkəmləndirdiyi birinci müdafiə xətti cəbhənin bəzi istiqamətlərində yarılıb, strateji əhəmiyyətə malik bir neçə yüksəklik və yaşayış məntəqələri düşməndən tam azad olunub.
1news.az
