Əbülfəs Qarayev UNİCEF-in rəhbərinin müavini ilə görüşüb - FOTO

Mədəniyyət və turizm naziri Əbülfəs Qarayev UNİCEF-in rəhbərinin müavini Castin Forsayt ilə görüş keçirib.

Nazirlikdən 1news.az-a verilən məlumata əsasən,  görüşdə Azərbaycan və UNİCEF əlaqələrinin tarixi inkişafı və ölkəmizin uşaqlar və gənclərlə bağlı siyasəti, ailə dəyərləri və UNİCEF-in bu istiqamətlərdə fəaliyyəti barədə fikir mübadiləsi aparılıb.

Nazir Əbülfəs Qarayev Ermənistanın Azərbaycan torpaqlarını işğal etməsi nəticəsində öz doğma yurdlarından zorla qovulmuş, məcburi köçkün və qaçqınların ailə vəziyyəti, xüsusilə də uşaqların mədəni özünü-ifadə hüquqlarının bu təcavüz nəticəsində məhdudlaşdırıldığını diqqətə çatdıraraq qaçqın və məcburi köçkün uşaqların hüquqlarının müdafiəsi ilə bağlı birgə layihələrin həyata keçirilməsini təklif edib.

Həmçinin mədəniyyətlərarası dialoq sahəsində uşaqların sülhə çağırış mesajlarına Azərbaycanın təşkil etdiyi tədbirlərdə, xüsusilə Bakı Prosesi çərçivəsində keçirilən Ümumdünya Mədəniyyətlərarası Dialoq Forumlarında yer ayrıldığını, mədəni proqramlar təşkil edildiyini diqqətə çatdırdı.

UNİCEF rəsmisi öz növbəsində Azərbaycanla əməkdaşlıq səviyyəsindən məmnun olduğunu bildirərək, qeyd edilən istiqamətlərdə Azərbaycanla birgə işləməyə hazır olduqlarını və yeni təyin olunmuş UNİCEF nümayəndəsinin bu məsələlərdə öz tövhələrini verəcəyinə əmin olduğunu ifadə etdi.

1news.az