Azərbaycan və İran gömrük xidmətləri arasında qarşılıqlı məlumat mübadiləsi məsələləri müzakirə edilib

Azərbaycan və İran gömrük xidmətləri arasında qarşılıqlı məlumat mübadiləsi məsələləri müzakirə edilib.

Dövlət Gömrük Komitəsinin mətbuat xidmətindən 1news.az-a verilən məlumata görə, müzakirələr İran İslam Respublikasının Astara şəhərində İran İslam Respublikası və Azərbaycan Respublikası gömrük xidmətlərinin nümayəndələri arasında keçirilən görüş zamanı aparılıb.

Tədbir Azərbaycan Respublikası Dövlət Gömrük Komitəsi və İran İslam Respublikası Mərkəzi Gömrük İdarəsi arasında imzalanmış Anlaşma Memorandumuna əsasən baş tutub.

İran tərəfini Gilan Vilayəti üzrə Gömrük İdarəsinin rəisi Məhəmməd Şahbazi, Astara Gömrük İdarəsinin rəisi Rəsul Omidiy və Beynəlxalq Əlaqələr İdarəsinin rəisi Əmir Həbibvənd təmsil edib. Azərbaycan tərəfindən isə görüşdə Dövlət Gömrük Komitəsi Fəaliyyətin Qiymətləndirilməsi və İnkişaf Proqramları Baş İdarəsinin rəisi, gömrük xidməti general-mayoru İqbal Babayev, Komitənin Xarici Əlaqələr İdarəsinin rəisi Dilavər Fərzəliyev və Astara Gömrük İdarəsinin rəisi Mirmahmud Miratayev iştirak edib.

Görüşdə iki ölkə arasında qarşılıqlı faydalı əlaqələrə toxunulub, o cümlədən iqtisadi-ticari münasibətlərdən söhbət açılıb. Azərbaycan və İran gömrükçülərinin vaxtaşırı keçirilən görüşlərinin də qarşılıqlı əməkdaşlığın genişləndirilməsinə, iki ölkə arasında mal və nəqliyyat vasitələrinin keçidinin sürətləndirilməsi və təhlükəsizliyinin təmin edilməsi işinə töhfə verdiyi bildirilib.

Sonra Azərbaycan və İran gömrük xidmətləri arasında qarşılıqlı məlumat mübadiləsi məsələləri müzakirə edilib.

Görüş başa çatdıqdan sonra isə nümayəndə heyətləri İranın Astara gömrük-sərhəd keçid məntəqəsində mövcud vəziyyətlə tanış olublar.

1news.az