BƏƏ-dən Əl-Cəzirə ilə bağlı bəyanat
Birləşmiş Ərəb Əmirliklərinin xarici əlaqələr üzrə dövlət naziri Anvar Qarqaş Əl- Cəzirə kanalı ilə bağlı bəyanat verib.
1news.az-a BƏƏ-nin ölkəmizdəki səfirliyindən daxil olan bəyanatda deyilir ki, Əl- Cəzirə terrorçu qrupları, zorakılığı dəstəkləyir, həmçinin şəbəkənin jurnalistlərinin hazırladıqları proqramda məzhəbçiliyin, anti-semitizmin yayılması halları təşfiq edilir:
“Hər şeydən əvvəl onu xatırlatmaq vacibdir ki, söz və ifadə azadlığı hüququnun qorunması əhəmiyyətli olsa da, bu, mütləq deyil. Beynəlxalq hüquqa əsasən milli təhlükəsizlik və ictimai asayişin qorunması üçün hüquqa məhdudiyyətlər qoyulur.
İfadə azadlığından ekstremist vasitələrin təbliğatını və qorunmasını təmin etmək üçün istifadə edilə bilməz. Terroristlər və onların tərəfdarlarının mətbuat və yeni texnologiyalardan ekstremist ideologiyaları yaymaq, mobilizasiya etmək, maliyyələşməni artırmaq məqsədi ilə istifadə etməsi beynəlxalq ictimaiyyəti daha ayıq-sayıq olmağa təşviq edir”.
Bəyanatda vurğulanıb ki, beynəlxalq hüquq terror aktlarına təhriki qadağan edir:
“Bu texnologiyalardan istifadə ilə bağlı olan təhdidlər, düşmənçilik, zorakılıq və ayrı-seçkiliyə təhrik edilməsi halları şişirdilə bilməz.
Bununla belə mən qeyd etmək istəyirəm ki, Birləşmiş Millətlər Təşkilatının Təhlükəsizlik Şurası terror aktlarına təhrik hallarını güclü şəkildə qınayıb və gələcədə terror aktlarına səbəb ola biləcək cəhdləri rədd edib”.
Pərvanə Sultanova
