“AZƏRKİTAB” Milli QHT Forumu ilə əməkdaşlıq edəcək - FOTO

“AZƏRKİTAB” Kitab Təbliğatı Mərkəzində “AZƏRKİTAB”  Kitab Təbliğatı Mərkəzi  ilə Azərbaycan Milli Qeyri-Hökumət Təşkilatları Forumu arasında memorandum imzalanıb.

1news.az-a Mərkəzin mətbuat xidmətindən verilən məlumata görə,   imzalanma mərasimindən əvvəl çıxış edən “AZƏRKİTAB” Kitab Təbliğatı Mərkəzinin layihə rəhbəri Mirisrafil Sabir Həsənov elm və təhsilin inkişafında, gənc nəslin milli ruhda yetişməsində, nitq və təfəkkür formalaşmasında mütaliənin mühüm rolu olduğunu qeyd edib.

Bildirib ki, Respublikada ən böyük Kitab Mərkəzini yaratmaqda məqsədi kitaba dönmək, cəmiyyətdə kitaba marağın artırılması və insanların həyatında onun yerini və rolunu yüksəltməkdir.

Mirisrafil Sabir Həsənov  “AZƏRKİTAB”ın dövlətin mədəniyyət və təhsil sahəsində apardığı siyasətə, xalqın mənəviyyatına xidmət etdiyini vurğulayıb.

Azərbaycan Milli Qeyri-Hökumət Təşkilatları Forumunun prezidenti Rauf Zeyni mütaliənin cəmiyyətin sosial həyatına, ictimai marağın istiqamətlərinə, mövcud maraqların məhsulu olan yeni ideyaların yayılmasına imkan yaratdığını qeyd edib.

Daha sonra “AZƏRKİTAB”  Kitab Təbliğatı Mərkəzi ilə  Azərbaycan Milli QHT Forumu arasında memorandum imzalanıb. Memarandum cəmiyyətdə kitaba marağın artırılması istiqamətində birgə bir sıra layihələrin həyata keçirilməsində, müvafiq təlimlərin, seminarların, bilik və bacarıqların artırılması üzrə məşğələlərin təşkil olunmasında əməkdaşlığı nəzərdə tutur.

1news.az