Olimpiya çempionlarını və 6 yaşlı qızı zorlayan həkimə 175 il iş verildi – FOTO
ABŞ-da idman gimnastikası üzrə milli yığmanın keçmiş həkimi Larri Nassar qadın idmançılara qarşı cinsi istismara görə 175 il müddətinə azadlıqdan məhrum edilib.
1news.az-ın verdiyi xəbərə görə, hökm yanvarın 24-də oxunub. Hakim Rozmari Akuilina qərarı özünəməxsus şəkildə şərh edib.
“Elə indicə sizə ölüm hökmünü imzaladım. Siz nə vaxtsa azadlığa çıxmağa layiq deyilsiniz”, –deyə qadın hakim bildirib.
Dinləmələr zamanı 170 şahid ifadəsi alınıb. İttihama görə, həkim müalicə bəhanəsi ilə heç bir tibbi məqsəd olmadan gimnastlara və digər qadınları çılpaq şəkildə müayinə edərək onlara qarşı seksual hərəkətlər edib.
Larrinin uzun müddət davam edən iyrənc əməllərinin üstü yaxın dostunun qızını zorlamasından sonra açılır. O, Kaylini hələ 6 yaşı olarkən zorlayıbmış.
Ötən ilin noyabr ayında Nassar gimnastlara qarşı 10 cinsi istismar faktı üzrə təqsirli olduğunu etiraf edib. Ümumilikdə ondan məhkəməyə 140 qadın, o cümlədən, olimpiya çempionları Simon Baylz, Aleksandra Raysman, Qabriella Duqlas və Makkayla Marouni şikayət edib.
Bundan əvvəl 8 dekabr 2017-ci ildə Nassar evində uşaq pornoqrafiyası saxladığına görə 60 il müddətinə azadlıqdan məhrum edilmişdi.
S.Xankişiyeva
