Elmar Məmmədyarov: Aİ ilə əməkdaşlıq Moskva ilə münasibətlərimizə təsir göstərməyəcək
“Azərbaycan öz qonşuları, xüsusən Rusiya ilə strateji tərəfdaşlıq münasibətlərinin inkişafına böyük əhəmiyyət verir. Siyasi, iqtisadi, ticari münasibətlər, humanitar və digər sahələrdə Rusiya ilə əməkdaşlığın inkişafında əldə edilmiş sanballı nəticələr bütövlükdə bizi qane edir”.
1news.az xəbər verir ki, bunu Azərbaycanın xarici işlər naziri Elmar Məmmədyarov RİA Novosti-yə müsahibəsində Azərbaycanla Avropa İttifaqı arasında yeni sazişin Bakı ilə Moskvanın münasibətlərinə təsir göstərə bilməsi barədə suala cavabında deyib.
O bildirib ki, Azərbaycan ilə Avropa İttifaqı arasında tərəfdaşlıq da qarşılıqlı faydalı əməkdaşlıq və qarşılıqlı hörmət əsasında inkişaf edir. Avropa İttifaqı ilə münasibətlərin inkişafına böyük diqqət yetirilir. Azərbaycan-Rusiya və Azərbaycan-Avropa İttifaqı münasibətlərinin müxtəlif müstəvilərdə inkişaf etməsinə baxmayaraq, bu münasibətlər, ilk növbədə, xalqlarımızın rifahına xidmət göstərir.
“Biz əməkdaşlıq layihələrində öz iştirakımızı eksklüziv deyil, inklüziv tərkib hissə kimi görürük. Yəni hər hansı tərəfdaşlıq layihəsində bizim iştirakımız başqa tərəfdaşların maraqlarına zidd ola bilməz, bizim belə məqsədimiz və ya niyyətimiz yoxdur.
Azərbaycan ilə Rusiya arasında strateji tərəfdaşlıq Aİ ilə Azərbaycanın münasibətlərinə təsir göstərmədiyi kimi, Avropa İttifaqı ilə bizim münasibətlərimiz də strateji tərkib hissəsinə malik olan Azərbaycan-Rusiya dostluq münasibətlərinə təsir göstərməyəcək”.
P.Sultanova
