TürkPA-nın seçkiləri izləyəcək müşahidə missiyanın tərkibi açıqlanıb
TürkPA-nın Azərbaycanda aprelin 11-də keçiriləcək Prezident seçkilərini izləyəcək beynəlxalq müşahidəçilər missiyasının tərkibi açıqlanıb.
1news.az xəbər verir ki, missiyanın tərkibinə Qazaxıstan Parlamenti Məclisinin üzvü Berik Ospanov, Qırğız Respublikasının Jogorku Keneşin üzvləri Duişon Torokulov və Salaidin Aydarov, Türkiyə Böyük Millət Məclisinin deputatları Haluk İpek və Ceyhun İrgil daxildir.
Qurumdan qeyd olunub ki, aprelin 10-da müşahidəçilər missiyasının Azərbaycan Milli Məclisinin sədri Oqtay Əsədov, xarici işlər naziri Elmar Məmmədyarov və Mərkəzi Seçki Komissiyasının sədri Məzahir Pənahovla görüşləri nəzərdə tutulur.
Bildirilib ki, səsvermə günü müşahidəçilər seçki prosesini yaxından izləmək məqsədi ilə Bakının bir sıra seçki məntəqələrini ziyarət edəcəklər.
Aprelin 12-də isə TürkPA missiya üzvləri seçkilərin yekununa dair mətbuat konfransı keçirəcəklər.
1news.az
