"Heydər Əliyev və Azərbaycanın inkişaf konsepsiyası" mövzusunda elmi-praktik konfrans keçirilib | 1news.az | Xəbərlər
Siyasət

"Heydər Əliyev və Azərbaycanın inkişaf konsepsiyası" mövzusunda elmi-praktik konfrans keçirilib

12:38 - 07 / 05 / 2018
"Heydər Əliyev və Azərbaycanın inkişaf konsepsiyası" mövzusunda elmi-praktik konfrans keçirilib

Bu gün Bakıda Azərbaycan Prezidenti yanında Qeyri-Hökumət Təşkilatlarına Dövlət Dəstəyi Şurasının təşkilatçılığı ilə "Heydər Əliyev və Azərbaycanın inkişaf konsepsiyası" mövzusunda elmi-praktik konfrans keçirilib.

1news.az xəbər verir ki, konfransda çıxış edən Azərbaycan Prezidenti yanında Qeyri-Hökumət Təşkilatlarına Dövlət Dəstəyi Şurasının sədri Azay Quliyev bildirib ki, Azərbaycan xalqının görkəmli oğlu, Ümummilli Lider Heydər Əliyevin həyat və fəaliyyəti hər bir soydaşımız üçün əzmkarlıq, mübarizə və qalibiyyət nümunəsidir. Ulu Öndərin müstəqil dövlət quruculuğu sahəsində gördüyü işləri təhlil edib geniş kütlələrə çatdırmaq və nəsillərin xatirində daim yaşatmaq dövlət əhəmiyyətli strateji məsələdir.

A.Quliyev deyib ki, Heydər Əliyev mükəmməl dövlət quruculuğu konsepsiyasını işləyib reallaşdıra bilən nadir və xoşbəxt tarixi şəxsiyyətlərdəndir: “Heydər Əliyev Azərbaycanın yeni Konstitusiyasını yaratmaqla sivil, demokratik, çoxpartiyalı dövlət sisteminin formalaşdırılmasına və ölkədə vətəndaş cəmiyyətinin inkişafına misilsiz töhfələr verdi, Azərbaycanın nüfuzlu beynəlxalq qurumlar və dünyanın aparcı ölkələri ilə əməkdaşlıq imkanlarını genişləndirdi”.

Şura sədri vurğulayıb ki, Ümummilli Lider Heydər Əliyev başladığı böyük dövlət quruculuğunu İlham Əliyev kimi bacarıqlı, müdrik və Azərbaycanın müstəqil dövlətçilik ideallarına sadiq bir şəxsiyyətə etibar etməklə ərazi bütövlüyümüz uğrunda mübarizənin, inkişafın, çiçəklənmənin və firavanlığın davamına tam zəmanət verdi.

Tədbirdə çıxış edən Azərbaycan Prezidentinin İctimai-siyasi məsələlər üzrə köməkçisi - şöbə müdiri Əli Həsənov bildirib ki, Azərbaycan dövləti Heydər Əliyevin hakimiyyətə gəldiyi 1993-cü ildən başlayaraq QHT-lərlə əməkdaşlıq kursu yeridir: "İlk dəfə Azərbaycan hakimiyyəti məhz Heydər Əliyevin hakimiyyəti dövründə QHT-lərə tərəfdaşı kimi baxmağa başladı və bunun nəticəsi olaraq, Azərbaycan Prezidenti yanında Qeyri- Hökumət Təşkilatlarına Dövlət Dəstəyi Şurası yaradıldı. Bu gün də Şura öz fəaliyyətini müvəffəqiyyətlə həyata keçirir".

Ə.Həsənov qeyd edib ki, Heydər Əliyev 15 ildir ki aramızda olmasa da, millətini, xalqını sevən, sağlam ruhlu hər bir azərbaycanlının ürəyində yer tutur.

Şöbə müdiri deyib ki, ümummilli liderin Azərbaycan xalqı qarşısındakı xidmətlərinin ön sırasında onun 1993-cü ildə Azərbaycan dövlətini xilas etməsi missiyası dayanır:

"Hər il qeyd etdiyimiz 15 iyun - Milli Qurtuluş Günü Heydər Əliyevin xilaskarlıq missiyasının başlandığı ən ali dəyərdir. Heydər Əliyev Azərbaycan dövlətini real məhv olma təhlükəsindən xilas etdi. Bu xilaskarlıq missiyası Azərbaycan tarixində məhz onun - Ulu Öndərin adına yazıldı. 1993-cü ildə Heydər Əliyev Azərbaycana qayıdaraq qurtuluş missiyasına başlayanda ölkədə vətəndaş müharibəsi gedirdi. Heç kimə sirr deyil ki, artıq regionlar bir-birinə qarşı, ölkənin ictimai-siyasi institutlarının hər biri bəlli qrupları, öz ətrafındakı silahlı dəstələri birləşdirərək Azərbaycan dövlətçiliyinə qarşı çıxırdılar. Bunun da başında o dövrdə adını siyasətçi qoymuş, hakimiyyəti ələ keçirən insanlar dayanırdı".

Prezidentin köməkçisi əlavə edib ki, Heydər Əliyevin xidmətlərindən biri
vətəndaşların milli birliyini yaratması oldu:

"Heydər Əliyev hakimiyyətə qayıdan kimi bütün azərbaycanlıları vahid bir amal ətrafında bir araya gətirərək milli birlik yaratmasaydı, Azərbaycan dövlətinin gələcəyindən danışmaq olmazdı. Odur ki, bu gün də inkişafımızın təməlində milli birlik əsasında bərqərar olmuş sabitlik dayanır. Ümummilli Lider hakimiyyətə gələn gün müraciət edərək bildirdi ki, hər bir azərbaycanlı "Dövlət mənim üçün nə etdi?" deməli deyil, "Mən vətənim üçün nə edə bilərəm?" deyə düşünməlidir".

Ə.Həsənov bildirib ki, Heydər Əliyevin əsas xidmətlərindən biri də azərbaycançılıq ideyasını dövlət səviyyəsinə gətirməsi oldu:

"Ümummilli liderin əsas xidmətlərindən biri də Azərbaycanın siyasi, ictimai inkişafının istiqamətlərini müəyyən etməsi və bunu Konstitusiyada təsbit etməsi oldu. 1993-cü ildə Azərbaycan müxtəlif modellər seçə bilərdi. Ümummilli Lider hakimiyyətə gələrkən başqa model də seçə bilərdi. Əminəm ki, Heydər Əliyevin nüfuzu o zaman elə güclü idi ki, hansı modeli seçsəydi, qəbul olunardı. O isə məhz ən mükəmməl yolu - Azərbaycan Xalq Cumhuriyyətinin müəyyən etdiyi inkişaf yolunu seçdi".

Ə.Həsənov bildirib ki, Heydər Əliyevin yaratdığı Yeni Azərbaycan Partiyası Azərbaycanın inkişafında önəmli rol oynayır. Ümummilli Liderin qurduğu Azərbaycan nəinki regionun aparıcı ölkələrindən biridir, eləcə də dünyada böyük nüfuza malikdir.

Tədbirdə daha sonra Ümummilli Lider Heydər Əliyevə həsr olunmuş qısametrajlı sənədli filmin təqdimatı keçirilib.

Azərbaycan Prezidenti yanında Dövlət İdarəçilik Akademiyasının rektoru, akademik Urxan Ələkbərov “Heydər Əliyev və Azərbaycanının inkişaf konsepsiyası: proses və nəticə” mövzusunda məruzə ilə çıxış edib.

Sonra Ümummilli Lider Heydər Əliyevə həsr olunmuş yeni mahnının təqdimatı olub.

1news.az 

Paylaş:
481

Son xəbərlər

Qrant qaçaqmalçılığında mənimsənilən pullar: Anar Məmmədli və İmran Əliyev işində yeni detallar - FOTO - VIDEO04 / 05 / 2024, 18:35Bölgələrə yağış yağıb - FAKTİKİ HAVA - YENİLƏNİB04 / 05 / 2024, 18:11Azərbaycan və Türkiyə XİN başçılarının görüşü olub04 / 05 / 2024, 17:47Azərbaycan və Kuba Gimnastika Federasiyaları arasında anlaşma memorandumu imzalanıb04 / 05 / 2024, 17:15Lənkəranda 13 yaşlı yeniyetmənin barmaqları ətçəkən maşında qalıb04 / 05 / 2024, 16:51Şərura dolu düşüb - FAKTİKİ HAVA04 / 05 / 2024, 16:24XİN Azərbaycanın NATO ilə əməkdaşlığına dair paylaşım edib04 / 05 / 2024, 15:49DYP “Bakı Marafonu-2024” ilə əlaqədar sürücülərə müraciət edib04 / 05 / 2024, 15:25Maştağada adam öldürməkdə şübhəli bilinən şəxs saxlanılıb04 / 05 / 2024, 15:09Qəzzada ölənlərin sayı 34 654 nəfərə çatıb04 / 05 / 2024, 14:55Tovuzda zəlzələ olub04 / 05 / 2024, 14:28Neftçilərə yeni mənzillər təqdim edilib - YENİLƏNİB04 / 05 / 2024, 14:18İlham Əliyev Türkiyə ilə baytarlıq sahəsində əməkdaşlığa dair sazişi təsdiqləyib04 / 05 / 2024, 14:15Prezident Azərbaycanla Türkiyə arasında gəlirlərə görə ikiqat vergitutmanın ləğv edilməsinə dair sazişi təsdiqləyib04 / 05 / 2024, 14:13Xankəndi Şəhər Prokurorluğu yaradılıb - SƏRƏNCAM04 / 05 / 2024, 14:11ABŞ Fondu minatəmizləmə işləri ilə əlaqədar Azərbaycana növbəti maliyyə dəstəyi göstərmək niyyətindədir04 / 05 / 2024, 13:59Sabunçuda köməkçi tikili yanıb04 / 05 / 2024, 13:35Səbaildə maşın oğurlayan şəxs saxlanılıb04 / 05 / 2024, 13:18Abşeronda gizli sexdə keyfiyyətsiz yuyucu vasitələr hazırlayan dəstə üzvləri saxlanılıb04 / 05 / 2024, 13:04Bazar gününün hava proqnozu04 / 05 / 2024, 12:49
Bütün xəbərlər