Türkiyəli siyasətçi XİN-dən adının "arzuolunmaz şəxslər" siyahısına salınmamasını xahiş edib
İşğal olunmuş ərazilərimizə qeyri-qanuni səfər etmiş Türkiyə vətəndaşı, Avropa Regionları Komitəsində Avropada Mühafizəkarlar və İslahatçılar qrupunun baş katibi Neva Sadıkoğlu-Novaki Azərbaycanın Belçika Krallığındakı səfirliyinə məktubla müraciət edərək, adının “Azərbaycan Respublikasının işğal edilmiş ərazilərinə qanunsuz səfər etmiş əcnəbilərin siyahısı”na daxil edilməməsini xahiş edib.
Bu barədə 1news.az-a Azərbaycan Xarici İşlər Nazirliyindən məlumat verilib.
Məlumatda deyilir ki, məktubunda N.Sadıkoğlu-Novaki təmsil etdiyi qurumun nümayəndəsi kimi Avropada Mühafizəkarlar və İslahatçılar Alyansının (ACRE) 2017-ci ilin dekabrında Yerevanda keçirilən tədbirində iştirak etmək üçün Ermənistana səfər etdiyini bildirir.
Türkiyə Respublikasının vətəndaşı olaraq ailə məsələlərinə görə hər il Azərbaycana səfər etdiyini və fərdi əsasda Dağlıq Qarabağ münaqişəsi ilə əlaqədar Azərbaycan Respublikasının mövqeyini dəstəklədiyini qeyd edən müəllif Azərbaycan ərazisinə daxil olmaq hüququnu niyyətli şəkildə təhlükə altına qoymazdı deyə yazıb. O, bu məktubu rəsmi üzrxahlıq kimi qəbul etməyi xahiş edib və ümidvarlığını ifadə edib ki, bu vəziyyət onun Azərbaycana səfər etmək üçün viza müraciətlərinə təsir etməyəcəkdir".
XİN-dən bildirilib ki, Neva Sadıkoğlu-Novakinin müraciəti müvafiq qaydada nəzərdən keçirilib və onun adının arzuolunmaz şəxslər siyahısına salınmaması barədə qərar qəbul edilib.
P.Sultanova
