Gürcüstan Suriya ilə diplomatik əlaqələri kəsdi
Gürcüstan Xarici İşlər Nazirliyi Suriyaya dövlətlər arasında diplomatik əlaqələrin kəsilməsinə dair nota göndərib.
1news.az xəbər verir ki, bu barədə Gürcüstan XİN-in rəsmi saytında məlumat verilib.
Qeyd edilib ki, rəsmi sənəd Suriyanın BMT və Misirdəki diplomatik missiyalarına təqdim edilib. BMT-nin baş katibinə də bu barədə məlumat verilib.
Xatırladaq ki, bu addımın səbəbi mayın 29-da Suriyanın Gürcüstanın separatçı Abxaziya və Cənubi Osetiya regionlarını müstəqil dövlət kimi tanıdığını bəyan etməsi olub.
Bununla bağlı yayılmış bəyanatda vurğulanır ki, tərəflər beynəlxalq hüququn təməl prinsiplərinə və əməkdaşlıq istəyinə sadiq olduqlarını elan ediblər. Onlar səfirlik səviyyəsində qarşılıqlı diplomatik əlaqələrin qurulacağını açıqlayıblar.
Bu separatçı birliklərin "müstəqilliyi" Rusiya, Nikaraqua, Venesuela, Vanuatu, Tuvalu və Nauru tərəfindən də tanınıb.
P.Sultanova
