Yaponiyada güclü zəlzələ olub: ölən və yaralananlar var
İyunun 18-də səhər saatlarında Yaponiyanın Osaka prefekturasının şimalında 6,1 bal gücündə zəlzələ olub.
1news.az-ın AZƏRTAC-a istinadən verdiyi xəbərə görə, Yaponiyanın Meteorologiya Agentliyinin 7 ballıq cədvəlinə əsasən zəlzələyə 6 bal intensivlik verilib. Sunami təhlükəsi elan edilməyib. Yeraltı təkanlar Hyoqo, Kioto, Şiqa və Nara prefekturalarında hiss olunub.
Yerli vaxtla saat 11:15 dəqiqədə yayılan məlumata görə, zəlzələ nəticəsində 3 nəfər həlak olub, 10-dan çox sakin müxtəlif xəsarətlərlə xəstəxanalara yerləşdirilib.
Qonşu Fukui prefekturasının rəsmi nümayəndələrinin bildirdiyinə görə, ərazidə yerləşən 15 atom reaktorunda ştatdankənar vəziyyət qeydə alınmayıb.
Zəlzələ nəticəsində “Şinkansen” sürət qatarlarının hərəkətində fasilə yaranıb. Yeraltı təkanlar yerli dəmir yolu xətlərində qatarların hərəkətinə də maneə yaradıb.
Regiondakı üç aeroportun işi dayansa da, sonradan bərpa olunub.
Azərbaycan Respublikasının Yaponiyadakı səfirliyindən verilən məlumata görə, Osaka şəhərində baş vermiş zəlzələdə həlak olanlar və ya yaralananlar arasında Azərbaycan vətəndaşının olması qeydə alınmayıb.
Yaponiyadakı səfirliyimiz məsələni diqqətdə saxlayır.
1news.az
