Koçaryan Paşinyanı məhkəməyə verdi
2008-ci ildə ölkənin konstitusiya quruluşunu devirməkdə ittiham edilən Ermənistanın sabiq prezidenti Robert Koçaryan baş nazir Nikol Paşinyanı ona böhtan atdığına görə məhkəməyə verib.
1news.az TASS-a istinadla xəbər verir ki, bu barədə Koçaryanın vəkili Aram Orbelyan məlumat verib.
Vəkil deyib ki, Paşinyan özünün 2008-ci il hadisələri ilə bağlı ictimaiyyətə ünvanlanan bəyanatlarında Koçaryanın şərəf və ləyaqətini alçaldan ifadələr işlədib. Sabiq prezident özünün şərəf və ləyaqətini böhtanlardan qorumaq məqsədilə məhkəməyə müraciət edib.
Daha əvvəl Paşinyan 2008-ci il martın 1-də keçirilən etiraz aksiyaları zamanı 10 nəfərin ölümündə Koçaryanı günahlandırıb. Koçaryan bu ittihamla iyulun 27-də həbs olunsa, avqustun 13-də Yerevan Apelyasiya Məhkəməsi onun toxunulmazlıq hüququnu əsas götürərək barəsində ölkəni tərk etməməklə sərbəst buraxılması haqqında qərar verib.
P.Sultanova
