Deputat: “Belarus Prezidentinin Azərbaycana səfəri çox lazımlı, vacib bir səfər idi”

“Belarus dövləti ilə Azərbaycanın münasibətləri hər zaman yaxşı olub”.

Bu barədə Belarus Prezidenti Aleksand Lukaşenkonun ölkəmizə səfəri ilə bağlı 1news.az-a danışan Milli Məclisin deputatı Elman Məmmədov deyib. Deputat qeyd edib ki, Belarusla Azərbaycan arasında bir çox sahələrdə əməkdaşlıq var:

“Belarus Prezidenti beynəlxalq tədbirlərdə, Müstəqil Dövlətlər Birliyinin tədbirlərində də hər zaman Azərbaycanın ədalətli mövqeyini dəstəkləyib, ədalətli mövqe ortaya qoyub. Bu səfərdə də Belarus prezidenti tək gəlməmişdi, böyük bir komanda ilə gəlmişdi. Dövlətlərarası münasibətlərdə, müxtəlif sahələrdə sənədlər imzalandı, əməkdaşlığın, tərəfdaşlığın daha da inkişaf etdirilməsi üçün məsləhətləşmələr aparıldı. Eyni zamanda Belarus prezidenti Aleksandr Lukaşenko yenə də açıq-aydın diplomatiyadan kənar sərt mövqeyini ortaya qoydu. Azərbaycanın qələbəsi, gördüyü işlərlə bağlı, Azərbaycanın regionda yüksəlməsi ilə bağlı, ədalətli mövqedə olması ilə bağlı öz fikirlərini bildirdi.

Cənab Prezidentimizin məlumatı əsasında onların özlərinin də istəyi ilə işğaldan azad olunmuş ərazilərimizdə dost əllərini uzatmaq fikrində olduqlarını bildirdilər. Müxtəlif sahələr üzrə mütəxəssislərin gəlməsi, nazirliklərin nümayəndələrinin iştirak etməsi bərpa işlərində Azərbaycana dəstək vermək istədiklərini də nümayiş etirdi. Əməkdaşlığın inkişafı üçün əllərindən gələni edəcəyini bildirdilər".

Deputat qeyd edib ki, Belarus Prezidentinin Azərbaycana səfəri çox lazımlı, vacib bir səfər idi:

“Belarusla Azərbaycan arasında olan isti münasibətlərin daha da inkişaf etdirilməsi üçün qərarlar qəbul edildi, sənədlər imzalandı. Əminliklə demək olar ki, bundan sonra da iki ölkə arasında münasibətlər yüksələn templə inkişaf edəcək”.