“Bizim heç kimin ərazi bütövlüyündə gözümüz yoxdur!”- Deputat ermənipərəst qüvvələrə səsləndi
Xəbər verdiyimiz kimi Azərbaycan öz torpaqlarını işğalçılardan təmizlədikdən sonra İranın Azərbaycanla sərhəddə hərbi təlimlərə başlaması ölkəmizdə narahatlıq yaratdı. Niyə məhz indi və Azərbaycanın ərazi bütövlüyünü bərpa etməsindən sonra? Ümumiyyətlə bu təlimlərin məqsədi nədir və kimə qarşıdır?
1news.az xəbər verir ki, bu və ya digər qaranlıq suallara İran tərəfi məntiqsiz açıqlamaları ilə müxtəlif donlar geyindirməyə çalışsalar da, Azərbayca tərəfi təhlükəli hal yarandıqda adekvat cavabın veriləcəyini bəyan etdi.
Məsələyə münasibət bildirən Milli Məclisin deputatı Arzu Nağıyev 1news.az-a açıqlamasında qeyd etdi ki, Cəbrayıl İranla həmsərhəd ərazisi olan rayondur. Həmin ərazidə baş verə biləcək təhlükənin qarşısını almaq üçün hər cür addımlar atılacaq:
“Azərbaycana qarşı hər hansı bir təhdid olarsa, qarşısı adekvat şəkildə alınacaq. Bizim heç kimin ərazi bütövlüyündə iddiamız yoxdur. Biz, BMT tərəfindən tanınan öz ərazimizi, sərhədlərimizi bərpa edirik. Bu istiqamətdə də öz işimizi davam etdirəcəyik. Növbəti mərhələdə də gündəmdə olan delimitasiya və demarkasiya, sərhədlərin açılması kimi vacib məsələləri həll edəcəyik".
Deputat əlavə etdi ki, vaxtilə Cocuq Mərcanlıda yaratdığmız infrastrukturların davamı kimi, Cəbrayılda da eyni ifranstrukturlar yaradılacaq:
“Cənab Prezident özü də çıxışında təhlükəsizlik tədbirlərinin görüldüyünü, tikinti-quruculuq işlərinin aparıldığı, qonşuluq siyasətinin inkişafı üçün müsbət istiqamətdə addımların atılması kimi vacib mesajlar verdi”.
Aytən Sakitqızı
