Siyasət

Rasim Musabəyov: Ukraynanı dərhal Avropa İttifaqına qəbul edin! - VİDEO

S.Xankişiyeva14:31 - 03 / 03 / 2022

Tanınmış politoloq, Milli Məclisin deputatı Rasim Musabəyov Ukraynanın xüsusi prosedur əsasında Avropa İttifaqına (Aİ) üzvlüyü ilə bağlı müraciətinə münasibət bildirib.

1news.az-ın verdiyi xəbərə görə, bu barədə o, Facebook səhifəsində yazıb:

“Avropa Parlamenti Ukraynanın hələlik namizəd-ölkə kimi Avropa İttifaqına üzv olmaq ərizəsini səs çoxluğu ilə dəstəklədi. Bu vacibdir, lakin kifayət deyil.

Əgər avropalılar həqiqətən də bu ölkənin müstəqilliyini dəstəkləmək istəyirlərsə və Kremlin “rus dünyası” birliyinin bərpa etmək şüarı altında Ukraynanı məhv etmək planlarına qarşı çıxırlarsa, o zaman namizədlik dövrü ilə bağlı köhnə sxemlərdən əl çəkib, Ukraynanın Avropa İttifaqına qəbulu ilə bağlı öz qərarlarını verməlidirlər.

Bu, təkcə Ukraynanın qəhrəman vətəndaşlarının müqavimətini üçqat artırmayacaq, eləcə də qondarma “DXR” və “LPR” əhalisini Ukrayna pasportlarını Rusiya pasportlarına dəyişdirib-dəyişdirməmək barədə ciddi düşünməyə sövq edəcək.

Hətta Rusiya Federasiyasına birləşdirilən Krımda belə yüz minlərlə sakində, xüsusən də gənclərdə təcrid olunmuş və sanksiyaya məruz qalmış Rusiyaya deyil, Ukrayna ilə birlikdə sivil Avropanın bir hissəsi olmaq arzusunun oyanacağına heç də təəccüb etmərəm.

Avropa perspektivi – istər maliyyə, istərsə də hərbi yardım baxımından cəlbedici və güclüdür. Ona görə də, Ukraynanı dərhal Avropa İttifaqına qəbul edin!”

Qeyd edək ki, Avropa Parlamenti Ukraynanın Avropa İttifaqına namizədliyi ilə bağlı müraciətinə müsbət cavab verib. Ölkənin Aİ-yə üzvlüyü ilə bağlı xüsusi prosedur başlayıb.

Prosedur Ukrayna Prezidenti Volodomir Zelenskinin Avropa Parlamentində Kiyevdən videokonfrans formatında çıxışından sonra başlayıb.