Ermənistan parlamenti Rusiya ilə birgə vahid HM sistemi barədə razılığı ratifikasiya edib

Ermənistan parlamenti Rusiya ilə birgə vahid Hava müdafiə (HM) sisteminin yaradılması haqda razılaşmanı ratifikasiya edib.

1news.az-ın RİA Novosti-yə istinadən verdiyi məlumata əsasən, ratifikasiyanın lehinə - 102 deputat, əleyhinə isə 8 deputat səs verib.

Ermənistanın müdafiə nazirinin müavini Ara Nazaryanın sözlərinə əsasən, bu sənəd Qafqaz bölgəsində HM sisteminin təkmilləşdirilməsinə imkan yaradacaq.

Onun sözlərinə görə, vahid sistemin hərəkətlərini Rusiyanın Hərbi Kosmik Güclərinin rəhbərliyi əlaqələndirəcək, ümumi nəzarət isə Rusiyanın Cənub Hərbi Dairəsinin rəhbərliyinin əlində olacaq.

A.Nazaryan Ermənistanın öz HM-dən “zəruri saydığı hədd və hədəflərlə” bağlı istifadə etmək hüququna malik olacaq.

“Ratifikasiyadan sonra biz öz HM vasitələrimizi istifadə etməyə davam edəcəyik, lakin onlara həmdə Rusiya resursları əlavə ediləcək. Söhbət həm uçan obyektlərdən, qırıcılardan, həm də zərbə vasitələrindən gedir. Bu hüquq, öncə əlimizdə olan operativlik səviyyəsini yüksəldəcək”, - deyə, A.Nazaryan əlavə edib.

Deputatların suallarını cavablandıran Nazaryan, razılaşmanın erməni HM sisteminin inkişafına heç bir məhdudiyyət qoymayacağını bildirib.

Xatırladaq ki, vahid HM sistemi haqda razılaşma 2015-ci ilin dekabrında Rusiya və Ermənistanın müdafiə nazirləri Sergey Şoyqu və Seyran Ohanyan tərəfindən imzalanıb.

Sənəd 5 il üçün nəzərdə tutulub və hər 5 ildən bir uzadıla bilər.

1news.az