İstanbul aeroportunda partlayış törədən kamikadzelərin şəxsiyyəti məlum oldu

İstanbulun Atatürk Hava Limanında terror aktını Rusiya, Özbəkistan və Qırğızıstan vətəndaşları törədib.

1news.az-ın verdiyi xəbərə görə, bu haqda Anadolu agentliyi məlumat yayıb.

“Terrorçulardan biri Rusiya vətəndaşı – dağıstanlı, digəri qırğız, üçüncüsü isə özbək idi”, - agentlik prokurorluqdakı mənbəyə istinadla yazır.

Daha əvvəl Milliyet xəbər vermişdi ki, kamikazdelər Tacikistan vətəndaşlarıdır. Digər KİV isə terrorçuların çeçen olduğunu iddia etmişdi.

Həmçinin Türkiyənin DİN rəhbəri Əfqan Əli bu gün bəyan edib ki, terrorçulardan yalnız birinin şəxsiyyəti müəyyən olunub.

Onun sözlərinə görə, terror hadisəsi ilə bağlı 13 nəfər, eləcə də 4 əcnəbi saxlanılıb:

“Terror hadisəsində 3 nəfər kamikazdeni saymasaq 43 nəfər həlak olub. Bunlardan 19 nəfəri əcnəbilərdir. Eləcə də hazırda xəstəxanalarda 94 nəfər müalicə alır”.

Xatırladaq ki, iyunun 28-də İstanbulun Atatürk Hava Limanının xarici xətlər terminalında baş verən terror aktı nəticəsində 36 nəfər həlak olub, 147 nəfər müxtəlif dərəcəli xəsarət alıb.

Hava Limanının girişində və terminalın parklanmasında kamikadze odlu silahdan atəş açaraq partlayıcı qurğunu işə salıb. 

Həmçinin Türkiyənin Baş naziri Binəli Yıldırım hadisəni törətməkdə İŞİD terrorçu qruplaşmasının törətdiyini də bəyan etmişdi.

1news.az