ACC-nin üzvləri Dağıstanda keçiriləcək festivalda iştirak edəcəklər

Azərbaycan Coğrafiya Cəmiyyətinin (ACC) üzvləri AMEA H.Əliyev adına Coğrafiya İnstitutunun elmi işçisi Emil Cəbrayılov və İT mütəxəssisi Üzeyir Mikayılov iyulun 9-dan 16-dək Rusiya Federasiyasının Dağıstan Respublikasında turizmin ekstremal növləri üzrə keçiriləcək Dağlar ilinə həsr olunmuş “Yarıdağ-2016”  açıq Beynəlxalq festivalda iştirak edəcəklər.

Cəmiyyətdən 1news.az-a verilən məlumata əsasən, festivalın təşkilatçıları Dağıstanın Turizm və Bədii Sənətkarlıq Nazirliyi, Rusiya Fövqəladə Hallar Nazirliyinin Axtarış Xilasetmə Dəstəsi, Dağıstanın  İdman Turizmi Federasiyası, Alpinizm Federasiyası və sairdir.

Tədbiri keçirməkdə məqsəd ekstremal vəziyyətlərdə praktiki bilik və bacarıqlardan istifadə, dağlıq ərazilərdə turizm və alpinizmin inkişafı, sağlam həyat tərzinin və aktiv istirahət növlərinin təbliği və sairdir.

ACC-nin üzvləri proqram çərçivəsində Azərbaycanın Rusiya ilə sərhədində yerləşən və ölkəmizin ən yüksək zirvəsi olan Bazardüzü dağına (4466 m) yürüş edəcək, orada Azərbaycanın və Azərbaycan Coğrafiya Cəmiyyətinin bayrağını dalğalandıracaqlar.

1news.az