Türkiyədə 15 iyul qurbanlarının xatirəsinə abidə ucaldılıb
Ankarada Türkiyə prezidenti Rəcəb Tayyib Ərdoğan, parlament spikeri İsmayıl Kahraman, Baş Qərargah rəisi və ölkə parlamentrailərinin iştirakı ilə hərbi çevriliş cəhdinin qurbanlarının xatirəsinə ucaldılan abidənin açılışı olub.
1news.az-ın məlumatına görə, Türkiyənin bütün böyük şəhərlərində hərbi çevriliş cəhdi zamanı həlak olanların xatirəsinə aksiyalar keçirilib.
Mərasimdə çıxış edən Ərdoğan bildirib ki, bu abidə gələcək nəsillərə türk xalqının qəhrəmanlarından bəhs edəcək.
“Onların əlində inamdan başqa heç nə olmayıb. Ancaq onlar təyyarə və tankları dayandırmağı bacardılar. Biz şəhidlərimizi torpağa tapşırsaq da, qəlbimizdə daim yaşayacaqlar. Çevrilişin təşkilatçıları isə təkrar-təkrar ölə-ölə, həbsxana divarları arasında çürüyəcəklər”, - deyə Türkiyə prezidenti qeyd edib.
Qeyd edək ki, 2016-cı il iyulun 15-də Türkiyədə hərbi çevriliş cəhdi olub. Nəticədə 246 nəfər ölüb, 2000-dən çox insan yaralanıb. 20 iyulda prezident Rəcəb Tayyib Ərdoğan ölkədə üç ay müddətinə fövqəladə vəziyyət rejimi elan edib. Fövqəladə vəziyyət rejimi bundan sonra bir neçə defə uzadılıb. Sonuncu dəfə Fövqəladə vəziyyət rejimi bu ilin aprel ayında daha 90 gün müddətinə uzadılıb.
1news.az
