Havay adalarına uçan təyyarə tualet probleminə görə təcili eniş etdi

ABŞ-ın “United Airlines” hava yolları şirkətinə aid sərnişin təyyarəsi tualetin həddindən artıq dolmasına görə təcili eniş edib.

1news.az-ın Oxu.az-a istinadən verdiyi xəbərə görə, bu barədə “Fox News” telekanalı məlumat yayıb.

Denverdən Havay adalarına uçan layner təyinat nöqtəsinə bir neçə saat qalmış havada dönərək San-Fransisko aeroportuna enib. Aeroportda təyyarə boşaldılıb və təyinat nöqtəsinə sərnişinlərin başqa təyyarənin göyərtəsində uçmasına qərar verilib. Beləcə, səkkiz saatlıq hava reysinin sərnişinləri əlavə səkkiz saat gözləməli olub.

Məlum olub ki, Denver aeroportunun işçiləri uçuşdan əvvəl təyyarəyə lazımi qaydada texniki xidmət göstərməyib.

“Hadisə çox xoşagəlməzdir və bizi məyus etdi”, - deyə üzrxahlıq edən “United Airlines” şirkətinin nümayəndəsi bildirib. Şirkət günahını özünəməxsus şəkildə yumağa çalışıb: sərnişinlərin hesablarına əlavə 10 min mil uçuş bonusunun əlavə olunmasını və ya 200 dollar məbləğində vauçer təklif edib.

2017-ci ilin avqust ayında “United Airlines” hava yolları şirkətinin pilotlardan biri təhdid dolu bəyanatlar səsləndirdikdən sonra onlarla sərnişin həmin şirkətin təyyarəsi ilə uçmaqdan imtina etmişdi.  

1news.az