Bu filmə görə Hindistanda 150-dən çox motosiklet və avtomobil yandırıldı
“Padmavat” tarixi-bədii bollivud dramının əleyhdarları Hindistanın qərbində yerləşən Hucarat ştatının Əhmədabad şəhərində və digər bölgələrdə artıq bir neçə gündür etiraz aksiyası keçirir.
1news.az-ın AZƏRTAC-a istinadən verdiyi xəbərə görə, etirazçılar əsasən induist qrupları, həmçinin Racput kastasının nümayəndələridir. Onlar filmdə induist şahzadəsi Padmavatinin uydurma obrazının nümayiş olunduğunu iddia edirlər.
Polis yanğın və digər vandalizm aktlarında iştirak edən 48 etirazçını saxlayıb. Hüquq-mühafizə orqanları onların kinoteatrların yaxınlığında yerləşən ticarət mərkəzlərinin önündə dayanan 150-dən çox motosikleti və avtomobili yandırdığını bildirib.
Asayiş keşikçiləri bütün ölkə ərazisində kinoteatrların yerləşdiyi rayonlarda təhlükəsizlik tədbirlərini gücləndirib. Buna baxmayaraq, bir çox kinoteatrın rəhbəri vandalizm aktından yayınmaq üçün filmin nümayişindən imtina edib.
Hələ ötən il “Racput Karni Sena” qruplaşmasının üzvləri filmin rejissoru Sancaya Bhansaliyə hücum etmiş və çəkiliş meydançalarından birini dağıtmışdılar. Bundan başqa, onlar şahzadə Padmavati rolunun ifaçısı aktrisa Dipiki Padukonun başına 50 milyon rupi mükafat qoyublar.
Qeyd edək ki, “Padmavat” filminin premyerası sabah, yanvarın 25-də baş tutmalıdır.
1news.az
