Yapon dənizində itkin düşən azərbaycanlılar Rusiya vətəndaşıdır - YENİLƏNİB

Yapon dənizində itkin düşən Rusiyanın "Vostok" balıqçı gəmisindəki azərbaycanlıların hər ikisi Rusiya vətəndaşıdır.

1news.az  APA-ya istinadla xəbər verir ki, bu barədə Saxalin vilayətinin Nevelsk şəhərindəki Azərbaycan icmasının Ağsaqqallar Şurasının sədri Camalxan Kərimov bildirib. Onun sözlərinə görə, Mübariz Hüseynov Salyan, Ruslan Əlizadə isə Kürdəmir rayonundandır. 
 
İcma nümayəndəsi hazırda Saxalin vilayətində hava şəraitinin çox pis olduğunu söyləyib.

1news.az  

10:40

Yapon dənizində itkin düşmüş Rusiyaya məxsus “Vostok” balıqçı gəmisindəki ekipaj üzvlərinin adları məlum olub.

1news.az “PrimaMedia.ru”-ya istinadən xəbər verir ki, onlar arasında iki azərbaycanlının olması ehtimalı var. Həmin şəxslər  Ruslan Əlizadə (1991) və Mübariz Hüseynovdur (1972). 

Xatırladaq ki, ümumilikdə gəmidə 21 nəfər itkin düşüb.

Saxalində balıqçı gəmisinin itməsi ilə əlaqədar Rusiya Cinayət Məcəlləsinini 236-cı maddəsinin 3-cü bəndi üzrə (Dəniz nəqliyyatının hərəkəti və istismarı üzrə təhlükəsizlik qaydalarının pozulması - ehtiyatsızlıqdan 2 və daha artıq şəxsin ölümünə səbəb olduqda) cinayət işi açılıb.

"Vostok" gəmisi Koreya Respublikasının Donqhe limanından Saxalin vilayətinin Holmsk limanına hərəkət edirmiş. Gəminin göyərtəsində 21 nəfər olub. Yanvarın 24-ü gecə qəza siqnalından sonra gəmi ilə əlaqə kəsilib. Axtarışlar davam edir.

P.Sultanova