Millət vəkili: Ermənilər yenidən təxribata əl atsalar layiqli cavablarını alacaqlar
“Ermənistan tərəfi cəbhədə təxribata əl atmaqda davam edərsə onların endirdiyi zərbələrdən qat-qat güclü cavablar alacaqlar. Azərbaycanın silahlı qüvvələri buna tam hazırdır”.
1news.az xəbər verir ki, bu sözləri Sonxeber.az-a açıqlamasında Milli Məclisin Hüquq siyasəti və dövlət quruculuğu komitəsinin sədr müavini, deputat Rövşən Rzayev ermənilərin cəbhə xəttində yenidən təxribata əl atmaları nəticəsində ordumuzun cavab atəşi ilə qarşı tərəfə ağır zərbələr endirməsinə münasibət bildirərkən deyib.
Onun sözlərinə görə, baş verənlərin hamısına ATƏT çərçivəsində Minsk qrupu həmsdər dövlət rəhbərləri qətiyyətli mövqe göstərməlidirlər:
“Ermənistanın silahlı qüvvələrini Azərbaycan ərazisindən çıxarsınlar ki, gənc əsgərlər həyatlarını itirməsinlər. Ermənilər bu təxribatdan əl çəkməlidirlər. Möhtərəm Prezident İlham Əliyevin bu məsələdə mövqeyi qətidir. Bu bütün dünya ictimaiyyətinə, aparıcı dövlətlərə bəllidir. Azərbaycanda ulu öndər Heydər Əliyev siyasəti yaşadıqca və bizim xalqımızn lideri cənab İlham Əliyevdirsə düşmənin bütün təxribatları layiqincə cavabını tapacaq.
Ali Baş Komandanın səyləri nəticəsində Azərbaycanın silahlı qüvvələri regionun ən güclü qüvvəsidir. Möhtərəm prezident İlham Əliyev hər zaman söyləyir ki, erməni əsgəri ölmək istəmirsə, Azərbaycan torpaqlarından çıxmalıdır. Yenidən təxribata əl atsalar layiqli cavablarını alacaqlar”- deyə, R.Rzayev vurğulayıb.
Qeyd edək ki, Ermənistan mətbuatı erməni hərbi qulluqçusu Ayk Kələntəryanın guya atəşkəs rejiminin pozulması nəticəsində ölməsi barədə məlumat yayıb.
Azərbaycanın Müdafiə Nazirliyi isə məlumat yayaraq bildirib ki, cəbhə xəttinin Füzuli istiqamətində Azərbaycan Ordusunun ön xətdə yerləşən mövqelərinə qarşı düşmən tərəfinin növbəti təxribat cəhdinin qarşısı bölmələrimiz tərəfindən görülən qabaqlayıcı tədbirlər nəticəsində alınıb. Ermənistan silahlı qüvvələri bölmələrinin 1 hərbi qulluqçusu məhv edilib və 2 hərbçisi isə ağır yaralanıb. Düşmən geri çəkilməyə məcbur edilib.
“Azərbaycan Ordusunun bölmələri cəbhə xəttində əməliyyat şəraitinə tam nəzarət edir”- deyə, MN-dən bildiriblər.
1news.az
