Hindistan səfiri cənub bölgəsinə səfər edib
Hindistanın Azərbaycandakı səfiri Sanjay Rana 14-15 fevral tarixlərində cənub bölgəsinə, Astara və Lənkərana səfər edib.
1news.az-a səfirlikdən verilən məlumata görə, diplomat burada rayon rəhbərləri ilə görüşlər keçirmiş, iqtisadi inkişaf üzrə atılmış mühüm addımlara dair məlumat alıb, Azərbaycan və Hindistanın bölgələri arasında əməkdaşlıq imkanlarını müzakirə edib.
Astara rayonu İcra Hakimiyyətinin başçısı Qəzənfər Ağayev ilə görüş zamanı səfirə kənd təsərrüfatı istehsalının hərtərəfli inkişafı üçün səylər, Hindistan və Asiyanın digər ölkələrini Azərbaycan, Rusiya və İran ilə birləşdirəcək Şimal-Cənub Nəqliyyat Dəhlizi üzrə yaradılmış infrastruktur haqqında məlumat verilib. Səfir, həmçinin turizm imkanlarının inkişaf etdirilməsi üçün Astarada inşa edilməkdə olan dənizkənarı bulvarı da ziyarət edib.
Lənkəran rayonu İcra başçısı Taleh Qaraşov ilə görüşü zamanı səfir Rana çəltik, çay və sitrus meyvələrinin məhsuldarlığının artırılması üzrə atılan addımlar haqqında məlumat alıb. Diplomat Lənkəranda Gilan Holdingə məxsus sitrus meyvələri plantasiyası, Yaşıl Şərq çəltik sahələri, Lənkəranın “Cənub-Agro” çəltik emalı zavodu və “Yaşıl Çay” çay plantasiyalarına baş çəkib. O, həmçinin yüksək keyfiyyətli qazanlar və istilik maşınlarının istehsalı üzrə tanınmış “Lənkəran Mexanikləşdirmə” istehsal fabrikini də ziyarət edib.
Səfir Hirkan Milli Parkına baş çəkib, bu nüfuzlu milli qoruğun flora və faunası və bir neçə bulaqları və məşhur Xanbulaq su anbarı olan bu bölgənin turizm imkanları haqqında məlumatlandırılıb.
Görüşlər zamanı diplomat kənd təsərrüfatı, Şimal-Cənub Nəqliyyat Dəhlizinin inkişaf etidirilməsi və sənaye layihələri daxil olmaqla, Hindistan və Azərbaycan arasında iqtisadi və ticari sahələrdə daha böyük əməkdaşlıq imkanlarını müzakirə edib.
P.Sultanova
