Çavuşoğlu: Xocalı qətliamının bir daha təkrarlanmasına izin verməyəcəyik - FOTO
1992-ci il fevralın 26-da erməni qüvvələri Xocalıda yüzlərlə azərbaycanlı günahsız qardaşlarımızı vəhşicəsinə qətlə yetirdi.
1news.az xəbər verir ki, bunu Türkiyənin xarici işlər naziri Mövlüd Çavuşoğlu "Twitter"dəki səhifəsində yazıb.
Çavuşoğlu qeyd edib: "Xocalı qətliamını unutmadıq, unutdurmayacağıq və bir daha təkrar olunmasına izin verməyəcəyik".
Xatırladaq ki, 1992-ci il fevralın 25-dən 26-na keçən gecə Ermənistan hərbi birləşmələri 7 min əhalisi olan Xocalı şəhərində soyqırımı aktı həyata keçirib. Xocalı soyqırımı zamanı 613 nəfər öldürülüb, 1000 nəfər müxtəlif yaşlı dinc sakin aldığı güllə yarasından əlil olub. 106 qadın, 63 azyaşlı uşaq, 70 qoca qətlə yetirilib. 8 ailə tamamilə məhv edilib, 25 uşaq hər iki valideynini, 130 uşaq isə valideynlərindən birini itirib. Faciə baş verən gecə 1275 dinc sakin əsir götürülüb, onlardan 150-nin taleyi hələ də məlum deyil.
P.Sultanova
