Mübariz Əhmədoğlu: Sərkisyanın Dağlıq Qarabağın statusu ilə əlaqəli mövqeyində kardinal dəyişiklik baş verib
S.Sərkisyan Dağlıq Qarabağ ermənilərinin öz torpaqlarında azad yaşamasını Dağlıq Qarabağ tənzimlənməsində ermənilərin son məqsədi elan etdi.
1news.az-ın məlumatına görə, bunu Siyasi İnnovasiya və Texnologiyalar Mərkəzinin sədri, politoloq Mübariz Əhmədoğlu Sərkisyanın Dağlıq Qarabağın statusu ilə bağlı açıqlamasını şərh edərkən bildirib:
“S.Sərkisyan ermənilərin Dağlıq Qarabağda azad yaşamaq hüququ ilə bağlı fikirlərini Münhendə ortalığa qoysa da bu fikri tam olaraq Livan prezidenti M. Aunla görüşdə inkişaf etdirdi. Bundan bir neçə gün öncəyədək S.Sərkisyan üçün Dağlıq Qarabağ tənzimlənməsində ən əsas məsələ Dağlıq Qarabağ xalqının öz müqəddəratını azad şəkildə müəyyən etməsi idi. “Dağlıq Qarabağda ermənilərin azad yaşaması” ifadəsi “Dağlıq Qarabağ ermənilərinin öz müqəddəratını təyinetməsi” ifadəsindən kəskin fərqlənir”.
Politoloqun fikrincə, S.Sərkisyan başa düşür ki, Dağlıq Qarabağ tənzimlənməsini yubatmaq, Ermənistan dövlətçiliyini zəiflədib.
“Bu həm də Sərkisyanın beynəlxalq ictimaiyyətə ümidsizliyinin göstəricisidir. Haqlı olaraq S.Sərkisyan başa düşüb ki, Ermənistanın Azərbaycan torpaqlarının 30 il işğal altında saxlamasına reaksiya verməyən beynəlxalq ictimaiyyət Ermənistanın belə taleyinə dözəcək.
S.Sərkisyan həm də inanır ki, yaxın illərdə Ermənistanda ondan güclü siyasətçi olmayacaq. Çünki ölkəsinin daxili siyasi həyatının müəllifi özüdür. Dağlıq Qarabağ tənzimlənməsində mümkün qədər çox əldə edə biləcək yeganə siyasətçi də məhz S.Sərkisyanın özünü hesab edir. Bunları nəzərə alaraq mövqeyini mümkün qədər Dağlıq Qarabağ tənzimlənməsindəki reallığa yaxınlaşdırır”.
Mübariz Əhmədoğlunun sözlərinə görə, Azərbaycan Respublikası multikultural dəyərlərin hökmran olduğu çoxmillətli və çoxdinli dövlətdir.
“Azərbaycanlılarla birlikdə ermənilərin Dağlıq Qarabağda azad, təhlükəsiz yaşamasına və inkişafına Azərbaycan Konstitutsiyası tam zəmanət verir. Təbii ki, S.Sərkisyanın dedikləri hələ ki, ciddi və ya geridönməz hal kimi qəbul edilməməlidir. Çünki fikrini tez-tez dəyişir. İndiki halda bəlkə də mövqeyini dəyişdirməyə vaxt çatdırmadı”.
S.Xankişiyeva
