Səsvermə prosesi necə aparılır? - İlk dəfə səs verənlər üçün
Aprelin 11-də keçiriləcək prezident seçkilərində 102 mindən çox gənc ilk dəfə səs verəcək.
Azərbaycanın paytaxtı və bölgələrində əhalinin səsvermə prosesi ilə bağlı təcrübəsi olmayan təbəqəsinin maarifləndirilməsi məqsədilə həm dövlət qurumları, o cümlədən icra hakimiyyəti orqanları, həm də vətəndaş cəmiyyəti institutları tərəfindən tədbirlər həyata keçirilir. Belə tədbirlərdə seçkilərdə ilk dəfə iştirak edəcək gənclərə onların seçki hüquqları, səsvermə prosesi və qaydalarından tutmuş seçkilərdə iştirak etmələrinin dövlət, xalq üçün hansı əhəmiyyəti daşıması kimi vacib nüans və məsələlər izah olunur, nəzəri məlumatlar verilir.
Məlumat üçün qeyd edək ki, seçki günü saat 7:50-də məntəqə seçki komissiyasının sədri seçki məntəqəsini açıq elan edir, seçki komissiyasının üzvlərinə, orada olan seçicilərə, müşahidəçilərə boş seçki qutularını göstərib kilidləyir. Saat 8:00-da isə səsvermə prosesinə başlanılır və 19:00-dək davam edir.
Məntəqə seçki komissiyalarının bir üzvü girişdə dayanaraq məntəqəyə daxil olan vətəndaşların şəxsiyyət vəsiqələrini və ya şəxsiyyəti təsdiq edən digər sənədləri, onun sol əlinin baş barmağının dırnaq və dərisinin bir hissəsinin maye ilə əvvəl işarələnib-işarələnmədiyini yoxlayır. Bu cür işarələnmə müəyyən edilərsə, seçiciyə seçki bülleteni verilmir. Digər halda seçici məntəqəyə buraxılır. Seçki komissiyasının üzvü seçicinin adının seçici siyahısında olduğunu yoxlayır və ona seçki bülleteni verir. Barmağının maye ilə işarələnməsindən imtina edən seçiciyə seçki bülleteni verilməyəcəyi izah edilir. Seçici razılaşmadıqda ondan seçki məntəqəsini tərk etməsi tələb edilir və seçici siyahısında “işarələnmədən imtina etdi” qeydi yazılır. Seçici razılaşarsa, seçicinin sol əlinin baş barmağı işarələnir.
Seçiciyə seçki bülleteni şəxsiyyət vəsiqəsi və ya onu əvəz edən sənəd təqdim edildikdə verilir. Seçici seçki bülletenini aldıqdan sonra seçicilər siyahısına şəxsiyyət vəsiqəsinin və ya onu əvəz edən sənədin seriyası və nömrəsi yazılır. Təqdim olunmuş şəxsiyyət vəsiqəsinin və ya onu əvəz edən sənədin seriyası və nömrəsi seçicilər siyahısına məntəqə seçki komissiyasının üzvü tərəfindən qeyd edilir. Seçici yazıların düzgünlüyünü yoxlayır və bülleteni alarkən imza atır. Seçicinin seçki bülletenini sərbəst almaq imkanı olmadıqda o, məntəqə seçki komissiyasının üzvləri və müşahidəçilər istisna olmaqla, başqa şəxslərin köməyindən istifadə edə bilər. Seçiciyə kömək edən şəxs öz soyadını və inisialını göstərməklə seçici siyahısında “seçicinin seçki bülletenini alması haqqında imza” qrafasında imza çəkməlidir.
Seçki bülleteni seçiciyə verilərkən onun nömrələnmiş sol küncü məntəqə seçki komissiyasının üzvü tərəfindən kəsilmə xətti boyunca kəsilir və özündə saxlanılır.
Hər bir seçici şəxsən və təklikdə səs verir. Başqa şəxslərin əvəzinə səs verməyə icazə verilmir. Seçki bülleteni seçicidən başqa heç kəsin daxil olmasına icazə verilməyən, gizli səsvermə üçün xüsusi avadanlıqla təchiz edilmiş otaqda və ya kabinədə doldurulur. Seçki bülletenini müstəqil yazıb doldurmaq imkanı olmayan əlil seçici, məntəqə seçki komissiyasının üzvlərindən və müşahidəçilərdən başqa, istədiyi şəxsi kömək üçün otağa və ya kabinəyə çağıra bilər. Bu şəxsin soyadı və inisialı seçicilər siyahısında seçki bülleteni alınması barədə seçicinin imzası ilə birgə göstərilir.
Seçici doldurulmuş seçki bülletenini səsvermə üçün nəzərdə tutulmuş seçki qutusuna salır.
Seçici seçki bülletenini doldurarkən səhv etdiyini bildirərsə, ona seçki bülleteni vermiş məntəqə seçki komissiyası üzvündən korlanmış seçki bülleteninin əvəzinə yeni seçki bülleteni verməsini xahiş edə bilər. Bu halda seçki komissiyasının üzvü korlanmış bülleteni ortadan kəsməklə ləğv edir, ayrıca zərfə qoyur, seçiciyə yeni bülleten verir və seçicilər siyahısında seçicinin soyadından sağda müvafiq qeyd edir. Bu barədə dərhal ayrıca akt tərtib olunur.
Hər bir seçicinin Seçki Məcəlləsində əksini tapan bu qaydaları bilməsi və səsvermə prosesində bunlara əməl etməsi onların ölkə Konstitusiyası ilə müəyyən edilmiş səsvermə hüququnun təmin olunmasına imkan verəcək.
Sechki-2018.az
