Misir səfiri: Dinc fələstinlilərin hədəfə alınmasını kəskin şəkildə pisləyirik
Misir Ərəb Respublikasının Azərbaycandakı fövqəladə və səlahiyyətli səfiri İbrahim Adil ölkəsinin Fələstinin mülki əhlisinin İsrail qüvvələri tərəfindən hədəfə alınmasını kəskin şəkildə pisləyir, öz qanuni və ədalətli haqlarının müdafiəsini tələb edən nümayişçilərə qarşı güc tətbiqini qətiyyətlə rədd edir.
Bu barədə 1news.az-a Misirin Azərbaycandakı səfirliyindən daxil olan açıqlamada deyilir.
Diplomat bildirib ki, Misir höküməti Fələstin torpaqlarında bu cür təhlükəli qarşıdurmanın mənfi nəticələri barədə xəbərdarlıq edərək, Fələstin xalqının başda paytaxtı şərqi Qüds olmaqla öz müstəqil dövlətini yaratmaq kimi qanuni haqlarını tam dəstəkləyir.
Səfir İbrahim Adil həmçinin bəyan edib ki, Misirin Səhiyyə Nazirliyi Qəzza bölgəsi üçün nəzərdə tutulan bir sıra tədbirlər görməkdədir, bunlara humanitar yardım, qida məhsulları və tibbi vəsait, bölgədə yerləşən xəstəxanaların təcili şəkildə dərmanlarla və tibbi ləvazimatla təchizi daxildir:
“Əlavə olaraq, Rəfah sərhəd keçid məntəqəsində təqribən 90 təcili yardım maşını və yüngül xəsarət almış yaralıların daşınması üçün 5 avtobusla təmin edilmiş böyük bir tibbi heyətin yerləşdirilməsinə də başlanılıb.
Həmçinin, xarici işlər naziri Samih Şükri Qüds problemi və regionda baş verən son hadisələrlə bağlı İstanbulda keçiriləcək növbədənkənar zirvə toplantısına qatılan Misir nümayəndə heyətinə rəhbərlərlik edəcəkdir.
P.Sultanova
