“Ermənistan sülhə məcbur edilməlidir” - Politoloq
Ermənistan regionda gərginlik yaratmaqla Cənubi Qafqazda vəziyyəti öz maraqlarına uyğun təhrif etməyə çalışır. Artıq 10 gündən çoxdur ki, hər gün Ermənistan tərəfindən müxtəlif formada Laçın, Kəlbəcər və digər istiqamətlərdə təxribatlar törədilirdi. Azərbaycan regionda sülhün təmin olunmağında maraqlı olduğunu dəfələrlə vurğulayıb. Buna baxmayaraq Ermənistan üzərinə götürdüyü öhdəliklərə sadiqlik nümayiş etdirmir. Cənubi Qafqazın bu situasiyada olmağında günahkar Ermənsitandır.
Bu fikirləri 1news.az-a açıqlamasında Sosial Tədqiqatlar Mərkəzinin (STM) baş məsləhətçisi, politoloq Tural İsmayılov söyləyib.
Politoloq qeyd edib ki, on bir ay ərzində Ermənistan silahlı qüvvələrinin dövlət sərhədinin Laçın və Kəlbəcər rayonları istiqamətində təxribatları, Azərbaycan Ordusunun həmin rayonların ərazisindəki mövqelərinin müxtəlif çaplı silahlardan atəşə tutulması halları intensiv və sistematik xarakter daşıyırdı.
“Təəsüflər olsun ki, Ermənistana qarşı beynəlxalq birlik tərəfindən heç bir xəbərdarlıq edilmədi bu 10 gün ərzində. Təxribatlara görə Ermənistan rəhbərliyinə qlobal məkandan hansısa şağırışların şahidi olmadıq. Nəticədə, Ermənistan təxribatları daha da qüvvətləndi. Bir neçə halda Ermənistan silahlı qüvvələrinin kəşfiyyat-diversiya qruplarının Azərbaycan Respublikasının ərazisinə sızma cəhdləri müəyyən edilib və hərbi birləşmələrimizin sayıqlığı nəticəsində onların qarşısı alınıb. Cənab Prezidentin vurğuladığı kimi, Azərbaycanın Dəmir Yumruğu yerindədir. Ermənistan və havadarlarının istənilən təxribatları hər an layiq olduğu cavabla qarşılaşır.
Bizi narahat edən məqamalrdan biri də odur ki, Ermənistanın yüksək çinli rəsmi şəxslərinin verdikləri açıqlamalara baxmayaraq, Ermənistan silahlı qüvvələrinin şəxsi heyətinin və hərbi texnikasının Rusiya sülhməramlılarının müvəqqəti yerləşdiyi Azərbaycan ərazilərində mövcudluğu və qanunsuz erməni hərbi birləşmələri ilə birgə fəaliyyəti davam edir. Bütün bu olanlar bölgədə stabilliyi təhdid edən əsas faktorlardır. Azərbaycan Respublikası tərəfindən Qarabağ və Şərqi Zəngəzurda Ermənistanın otuz illik işğalının nəticəsi olaraq, genişmiqyaslı və çətin humanitar mina təmizləmə fəaliyyəti aparıldığı halda, Ermənistan tərəfindən yenə də Azərbaycan ərazilərində qəsdən mina basdırılması əməlləri davam edir. Mina problem ilə bağlı isə nə bu dahə üzrə məsul institutlar, nə də dövlətlər hansısa addımlar atmırlar.
Azərbaycan sərhədinin yaxınlığında təhlükəsiz zona yaradılmalıdır. Əks təqdirdə Ermənistanın təxribatları davam edəcək. Azərbaycan ordusu istənilən təxribat hallarına qarşı qabaqlayıcı tədbirlərini davam etdirir. Ermənistan sülhə məcbur edilməlidir. Ermənistanda revanşizmin baş qaldırmasına imkan vermək olmaz. Revanşizm bütün regiona siyasi təhlükələr yaradır”.
1news.az
