Tiflis Dövlət Universitetində Dünya Azərbaycanlılarının Həmrəyliyi Gününə həsr olunan tədbir keçirilib - FOTO
Dekabrın 24-də İvane Cavaxişvili adına Tiflis Dövlət Universitetində Heydər Əliyev Fondunun təşkil etdiyi "Azərbaycan Mərkəzi"ndə 31 Dekabr-Dünya Azərbaycanlılarının Həmrəyliyi Gününə həsr olunan tədbir keçirilib.
Tədbirdə universitetin azərbaycanlı tələbələri iştirak ediblər. Tədbiri mərkəzin əlaqələndiricisi Leyla Əmrahova açaraq tələbələrə 31 Dekabr-Dünya Azərbaycanlılarının Həmrəyliyi Gününün tarixi haqqında ətraflı məlumat verərək, qeyd edib ki, dünyanın harasında yaşamağından asılı olmayaraq, hər bir azərbaycanlı öz millətini, Azərbaycan dövlətini unutmamalı, azərbaycançılıq ideyalarını təbliğ etməli və Azərbaycan adlı vətənin adını ucaltmalı, nəhayət milli və mənəvi birliyimizi gücləndirməlidir.
Tədbirdə çıxış edən tələbələr Gürcüstanın ali təhsil müəssisələrində təhsil alan digər azərbaycanlı gənclərin Gürcüstanda daha həmrəy olduqlarını, azərbaycanlıların milli birliyinə, həmçinin gürcü xalqının nümayəndələri ilə dostluğu və qardaşlıq ənənələrini, xalqlarımızın isti münasibətlərini həmişə qorumağa və inkişaf etdirməyə çalışdıqlarını bildiriblər.
Sonda tələbələr 31 Dekabr-Dünya Azərbaycanlılarının Həmrəyliyi Günü ilə bağlı universitetdə, Gürcüstanda yaşayan azərbaycanlılar arasında və digər yerlərdə mütəmadi olaraq söhbətlər aparmaq və bu əlamətdar günü ümumdünya həmrəyliyi günü kimi yaşatmaq və inkişaf etdirmək üçün təbliğatı gücləndirmək qərarına gəliblər.
Azərbaycanlı tələbələr həmin gün TDU-nun rektoru Vladimir Papava, Azərbaycanın Gürcüstandakı səfirliyinin rəsmiləri Dursun Həsənov və Əli Əlabbasov ilə də görüşərək Həmrəylik Günü haqqında fikir mübadiləsi aparıblar. TDU-nun rektoru V. Papava Azərbaycan və azərbaycanlılar haqqında özünün müsbət fikirlərini söyləyib.
Görüşün sonunda universitetin rektoru azərbaycanlı tələbələrə təhsildə və ictimai işlərdə, həmçinin həyatda uğurlar arzulayıb.
APA
