Azərbaycanda banklar dollar və avro satışını dayandırdı
7 yanvar tarixində ölkənin iri bankları xarici valyuta çatışmazlığına əsaslanaraq dollar və avro satışını dayandırıb.
1news.az müxbirinin dollar dəyişmək istəyi demək olar ki, bütün banklarda uğursuzluqla nəticələndi. Maliyyə bazarındakı mənbələrin məlumatına görə, bu problem hesablardakı valyutanın banklar tərəfindən rezervasiya olunması ilə əlaqədardır.
“Dollar və avro yalnız bu valyutalar üçün açıq depozit tələbatı ilə əlaqədar verilir Dəyişmə əməliyyatları hələ ki həyata keçirilmir.
Mənbələrin qeyd etdiyi kimi bu AR Mərkəzi Bankı tərəfindən banklara xarici valyuta satışının dayandırılması ilə əlaqədardır. Bunun nəticəsində bazarda xarici valyuta qıtlığı müşahidə olunur.
“Lakin bu məsələdə bankları günahlandırmaq olmaz. Valyuta çatışmazlığı olduğu təqdirdə onlar fəaliyyətdə olan depozitlərlə bağlı öhdəliklərini yerinə yetimək üçün əllərindəki valyutanı qoruyur”,- deyə mənbə qeyd edir.
Qeyd edək ki, 7 yanvar tarixində AMB tərəfindən 1 ABŞ dolları 1,5626 AZN, 1 avro isə 1,6913 AZN olaraq müəyyənləşib.
Həmçinin, bu gün məlum olub ki, Azərbaycan Mərkəzi Bankının İdarə Heyəti “ Valyutadəyişmə əməliyyatlarının aparılması və məntəqələrdə valyutadəyişmənin təşkili qaydaları”na yeni dəyişikliklər əlavə edib.
Artıq 500 dollardan çox məbləğ dəyişdirildiyi zaman şəxsiyyəti təsdiq edən vəsiqə təqdim olunmalıdır. Əvvəllər 5000 ABŞ dollarının dəyişdirilməsi zamanı şəxsiyyət vəsiqəsinin təqdimi tələb olunurdu.
Həmçinin, yeni qaydalara görə, artıq valyuta satışı kursunu banklar müstəqil olaraq özləri müəyyənləşdirəcək.
Valyuta kursu bankın xüsusi əmri ilə təsdiq olunacaq. Bu halda bankın hər bir filialı və valyutadəyişmə məntəqəsində qiymət fərqli ola bilər.
Əgər Mərkəzi Bank tərəfindən məntəqələrdə valyutanın satışı və alışında limit qoyularsa, banklar valyuta kursunu müəyyən edərkən bunu nəzərə almalıdır.
Lakin 1news.az –ın məlumatına görə son bir neçə gün ərzində AMB tərəfindən belə bir limit qoyulmayıb.
Buna görə də müxtəlif banklarda valyuta kursları bir-birindən kəskin şəkildə fərqlənir. Belə ki, 6 yanvar tarixində Mərkəzi Bankın açıqladığı rəsmi satış kursu 1,5610 AZN/USD olduğu halda, AGBank-da dolların satışı 1,8 AZN/USD olaraq müəyyən olunmuşdu.
