Mübariz Əhmədoğlu: “Naxçıvana atəş açmaqda Ermənistanın məqsədi KTMT-ni müharibəyə qoşmaqdır”

Kollektiv Təhlükəsizlik Müqaviləsi Təşkilatı (KTMT) Dağlıq Qarabağ münaqişəsində Ermənistanın əlində Azərbaycanı hədələyən mexanizmə çevrilib.

1news.az-ın məlumatına görə, bunu Siyasi İnnovasiya və Texnologiyalar Mərkəzinin direktoru, politoloq Mübariz Əhmədoğlu Dağlıq Qarabağ münaqişəsi ilə bağlı son hadisələri şərh edərkən deyib.

“Amma imkan düşəndə Ermənistan KTMT-ni praktiki baxımdan da Azərbaycana qarşı addım atmağa sövq edib. Ermənistanın KTMT-yə sədrliyə başlamaq ərəfəsində Ermənistan-Azərbaycan sərhədində vəziyyəti gərginləşdirdi. Hətta Rusiya dövlət nişanlı avtomaşını Ermənistan-Azərbaycan dövlət sərhədinə yaxın ən qısa məsafəyə qədər sürdürdü. Sürücüsü milliyyətcə osetin olan bu yük avtomobili Azərbaycan hərbçilərinin gözünün qabağında təxribat xarakterli manevrlər etdi. O zaman KTMT qısaca münasibət bildirməklə kifayətləndi. Ermənilər ancaq buna nail ola bildilər”.

Dağlıq Qarabağda gedən döyüşlərdə Ermənistanın məğlub olmasına diqqət çəkən M.Əhmədoğlunun sözlərinə görə, Ermənistan KTMT-nin daha aktiv şəkildə işə qoşulmasında maraqlıdır:

“Dağlıq Qarabağda, qoşunların təmas xəttində şiddətli döyüşlər getdi. Ermənistan bu döyüşləri uduzur. KTMT Dağlıq Qarabağda gedən döyüşlərə yalnız ritorik münasibət bildirir. Bundan artığına KTMT-nin hüquqi səlahiyyəti çatmır. Ermənistan isə KTMT-nin daha aktiv şəkildə işə qoşulmasında maraqlıdır; Qarabağda uduzduqlarının qisasını bəlkə Ermənistan-Azərbaycan dövlət sərhədində aldı”.

Politoloq bildirib ki, Ermənistan-Azərbaycan dövlət sərhədinin Naxçıvan hissəsi isə ermənilərə daha böyük konfliktogenlik vəd edir. Ermənilərə görə, Naxçıvanda müharibə olacaqsa Türkiyə də işə qarışa bilər:

“Türkiyə NATO dövlətidir. Bir tərəfdə Rusiya-KTMT, digər tərəfdə isə Türkiyə-NATO. Beləliklə, Ermənistan NATO-KTMT münaqişəsi yaratmaqla Dağlıq Qarabağ mövzusunu unutdurmuş olur. Bu xəstə erməni beynin ortalığa qoyduğu ideyadır. Erməninin düşməni Azərbaycan və Türkiyə deyil, erməninin düşməni belə erməni beyinləridir. İndi Ermənistana rəhbərlik edənlərdir”.

1news.az