İlk “ağıllı” köynək nümayiş olunub

“Broadcast” şirkəti istifadəçilərə zamanla ayaqlaşmağa və bədən tonusunu saxlamağa imkan verən dünyanın ilk “ağıllı” köynəyini nümayiş etdirib.

1news.az ICTnews-a istinadən xəbər verir ki, hazırda şirkət layihənin həyata keçirilməsi üçün maliyyə vəsaiti toplamaqla məşğuldur.

Bu ilin sonunadək planın həyata keçiriləcəyi təqdirdə amerikalılar artıq növbəti ildə “ağıllı” köynəkləri 70 dollara ala biləcəklər. Geyim vasitəsilə istifadəçilər olduqları yeri izləyə, qət edilən məsafənin təhlilini apara, çəkini saxlaya, qida qəbulunun vaxtına əməl edə biləcəklər. Köynəyə quraşdırılmış cihaz, həmçinin sərf edilən kalorinin miqdarını, istifadəçinin məqsədinə nail olmaq üçün qət etdiyi pillələrin ümumi sayını hesablayır.

Bundan başqa, “ağıllı” geyim konsepsiyası smartfonla tam sinxronlaşmanı nəzərdə tutur. Bunun sayəsində qurğu sahibi daim əhval-ruhiyyəsini izləyir, səhhətini yaxşılaşdırmaq üçün informasiyanı təhlil edir. Sinxronlaşdırma müddəti 15 dəqiqə təşkil edəcək və nəticədə aktual məlumatlar həmişə istifadəçinin telefon proqramında saxlanılacaq.

Mütəxəssislərin sözlərinə görə, “ağıllı” geyimin köməyi ilə qurğuların əldə və ya ayaqda daşınması zərurətini tam aradan qaldıracaq. Geyimi dəyişmək lazım gəldikdə isə cihazı digər köynəyə, pencəyə və koftaya quraşdırmaq olar. Bu halda qurğu və istifadəçi arasında məsafənin az olması vacibdir. Belə qurğuların ilk prototiplərinin növbəti ildə satışa çıxarılacağı gözlənilir.

1news.az