“Erməni terror təşkilatı dedikdə ağlımıza ilk ASALA gəlir, lakin erməni lobbisinin nəzarəti altında olan çox sayda erməni terror qrupları mövcuddur, ümumilikdə xarici ölkələrdə fəaliyyət göstərən diplomatik korpusu və diplomatları təhlükəsizliyinin təmin olunması həmin ölkənin bilavasitə öhdəliyindədir”.

Bu sözləri 1news.az-a açıqlamasında Milli Məclisin deputatı Cavid Osmanov deyib. Onun sözlərinə görə, hər bir səfirliyin yerləşdiyi ölkə ərazisində təhlükəsizliyi təmin olunmalıdır:

“Ermənistan bir ölkə olaraq hər zaman terrorizmin mərkəzi sayılır və Ermənistan tərəfindən dünyanın müxtəlif ölkələrində qanlı terror aktlarının həyata keçirildiyini görmüşük. O cümlədən Ermənistan hər zaman Azərbaycana qarşı terrorçu siyasətini yürüdüb. Bu gün də ermənilərin terrorçu siyasəti Azərbaycana qarşı davam etməkdədir. Xüsusən də 2020-ci ilin iyul ayının 12-də Tovuz istiqamətindən ermənilər tərəfindən başladılan genişmiqyaslı təxribat zamanı erməni terrorçuları dünyanın müxtəlif ölkələrində Azərbaycanın diplomatik korpuslarına, o cümlədən xaricdə yaşayan soydaşlarımıza qarşı terror aktları keçirirdilər. 44 günlük Vətən Müharibəsi zamanı ermənilər bu terroru davam etdirirdilər. 44 günlük müharibənin sonunda Azərbaycan öz tarixi torpaqlarını erməni işğalından azad etdikdən sonra da ermənilər yenə də öz məkirli əməllərindən geri qalmırlar. Erməni lobbisinin maliyələşdirdiyi terror qrupları Azərbaycanın xarici ölkələrdəki səfirliklərinə hücumlar təşkil edirlər. Erməni terror təşkilatı dedikdə ağlımıza ilk ASALA gəlir, lakin erməni lobbisi nəzarəti altında olan çox sayda erməni terror qrupları mövcuddur. Bu "Diplomatik əlaqələr haqqında" 1961-ci ildə qəbul edilmiş Vyana Konvensiyasına uyğun olaraq diplomatik nümayəndəliyi hər cür hücumlardan qorumaq və nümayəndəliyin sakitliyinin pozulmamasının və şərəfinin təhqir olunmamasını təmin etmək yerləşmə dövlətinin xüsusi vəzifəsidir. Bu cür terroru törədənlər aşkarlanmalı və onlara hüquqi qiymət verilməlidir. Parisdə erməni terrorçuları tərəfindən Azərbaycan səfirliyinə hücum qınanılmalı, rəsmi Paris bu məsələyə aydınlıq gətirməli və ciddi tədbirlər görməlidir”.

Aynurə Xudaverdiyeva