Deputat Könül Nurullayevanın rəhbərlik etdiyi qrup Xorvatiyada səfərdə olub | 1news.az | Xəbərlər
Siyasət

Deputat Könül Nurullayevanın rəhbərlik etdiyi qrup Xorvatiyada səfərdə olub

11:51 - 30 / 09 / 2022
Deputat Könül Nurullayevanın rəhbərlik etdiyi qrup Xorvatiyada səfərdə olub

Azərbaycan-Xorvatiya parlamentlərarası əlaqələr üzrə işçi qrupunun rəhbəri millət vəkili Könül Nurullayeva, qrupun üzvləri Eldar Quliyev və Kamran Bayramov Xorvatiya-Azərbaycan parlamentlərarası dostluq qrupu rəhbərinin dəvəti ilə sentyabrın 25-də Xorvatiyaya səfər ediblər.

Səfərin ilk günündə nümayəndə heyəti Xorvatiyanın Xarici və Avropa işləri Nazirliyinin dövlət katibi Frano Matusiçlə görüşüb. Nümayəndə heyətinin sədri K.Nurullayeva vurğulayıb ki, Azərbaycan və Xorvatiya bir çox beynəlxalq təşkilatlar çərçivəsində səmərəli əməkdaşlıq edir və bu əməkdaşlığın qarşılıqlı şəkildə genişləndirilməsi bizim prioritetlərimizdən biridir. Həmçinin K.Nurullayeva çıxışı zamanı iki ölkə arasında indiyədək imzalanmış sazişlər, parlamentlərarası əlaqələrin inkişafı məqsədilə görülmüş işlər, habelə beynəlxalq təşkilatlar çərçivəsində davam edən əməkdaşlıq barədə məlumat verib.

Milli Məclisin Hesablayıcı Komissiyasının sədri Eldar Quliyev də ikitərəfli münasibətlərin inkişafına toxunub. Deputat həmçinin iki il əvvəl, sentyabrın 27-də baş verən İkinci Qarabağ müharibəsini xatırladıb. Bildirib ki, Azərbaycan BMT Təhlükəsizlik Şurasının 4 qətnaməsini icra edərək, öz ərazi bütövlüyünü bərpa etdi və işğala son qoydu. Bu gün Qarabağda və Şərqi Zəngəzurda yüksək standartlara uyğun bərpa-quruculuq işləri aparıldığını bildirən E.Quliyev mina probleminin bölgənin sürətli inkişafına mane olan əsas faktorlardan biri olduğunu vurğulayıb. Qeyd edib ki, mina problemi mülki insanların həyatını itirməsinə səbəb olur. E.Quliyev Azərbaycanın bölgədə dayanıqlı sülh və təhlükəsizliyin yaranmasında maraqlı olduğunu diqqətə çatdırıb.

Regional məsələlər, həmçinin Beynəlxalq münasibətlər və parlamentlərarası əlaqələr komitəsinin üzvü Kamran Bayramov isə iki ölkə arasında əlaqələrin yüksək səviyyədə olduğunu diqqətə çatdırıb. Azərbaycanın Şəki və Xorvatiyanın Varajdin şəhərlərinin qardaşlaşmış şəhərlər olduğunu xatırladıb. Bildirib ki, regional inkişaf ikitərəfli münasibətlərdə əsas istiqamətlərdən biridir. Bu cür regionlararası əməkdaşlıq, Azərbaycan ilə Xorvatiya arasında mövcud ikitərəfli əlaqələrin daha da genişlənməsinə öz töhfəsini verəcək.

Nümayəndə heyətimiz, həmçinin Xorvatiyanın İqtisadiyyat və Davamlı İnkişaf Nazirliyinin dövlət katibi İvo Milatiçlə də görüşüb. Görüşdə çıxış edən Könül Nurullayeva ölkələr arasında olan ikitərəfli əməkdaşlıqda iqtisadi əlaqələrin mühüm yer tutduğunu və Xorvatiyanın Azərbaycanla ticarət baxımından ən geniş əməkdaşlıq edən 10 ölkə sırasında olduğunu xatırladıb. K.Nurullayeva həmçinin Azərbaycan və Xorvatiya Hökumətləri arasında İqtisadi Əməkdaşlığın Təşviqi üzrə Birgə Komissiyanın və ölkəmizdəki Xorvatiya şirkətlərinin fəaliyyəti barədə məlumat verib, enerji sahəsində əməkdaşlığın da perspektiv vəd etdiyini qeyd edib. Sonda K.Nurullayeva Azərbaycanın işğaldan azad edilmiş ərazilərində aparılan yenidənqurma işlərində Xorvatiya şirkətlərinin də yer almasından məmnunluq hissi duyduğunu və onların bu istiqamətdə daha fəal olacağına ümid etdiyini bildirib.

Dörd gün davam edən səfər çərçivəsində nümayəndə heyəti Karlovaç şəhərində də olublar. Burada millət vəkilləri vilayət rəhbəri Martina Furdek Haydin, şəhərin icra başçısının müavini İvano Foçiç, Xorvatiya-Azərbaycan parlamentlərarası dostluq qrupunun rəhbəri Maya Qrba Buyeviç, Karlovaç İqtisadiyyatının Xorvatiya Palatasının prezidenti Zlatko Kuzman, Karlovaç vilayətinin Xorvatiya Turizm Şurasının prezidenti Zelko Fanyak, Xorvatiya Parlamentinin Qanunvericilik Komitəsinin sədri Mariya Yelkovaç və Xorvatiya Parlamentinin Seçkilər, təyinatlar və idarəetmə Komitəsinin sədri Nada Murganiç ilə görüşüblər. Karlovaç vilayət rəhbərliyinin ofisində baş tutan görüşdə Azərbaycan nümayəndə heyətinin sədri K.Nurullayeva görüşün 27 sentyabr Azərbaycanın anım gününə təsadüf etdiyini xatırladaraq Vətən müharibəsindən danışıb. Şəhidlərimizin əziz xatirəsinə ehtiram ifadə olunub. Deputat bildirib ki, Azərbaycan 44 gündə 30 illik işğala son qoyub və böyük Qələbə əldə edib. Xorvatiya ilə ikitərəfli münasibətlərə də toxunan K.Nurullayeva Azərbaycanın Şəki şəhəri ilə Xorvatiyanın Varajdin şəhəri arasında imzalanmış əməkdaşlıq sənədləri barədə məlumat verərək Karlovaç şəhəri ilə də bu cür əməkdaşlıq imkanlarının müzakirə edilməsini təklif edib. Millət vəkili Eldar Quliyev isə öz növbəsində ikitərəfli əlaqələrin perspektivlərinə toxunub. İkinci Qarabağ müharibəsində Azərbaycanın əldə etdiyi böyük Qələbənin yaratdığı imkanlardan danışıb. Diqqəti bölgənin rifahına xidmət edən Zəngəzur dəhlizinin əhəmiyyətinə yönəldib.

Millət vəkili Kamran Bayramov isə Karlovaç şəhərinin sənaye şəhəri olduğunu xatırladaraq, ikitərəfli əməkdaşlıqda bu sahə üzrə də qarşılıqlı imkanların dəyərləndirilməsinin vacibliyini qeyd edib.

Nümayəndə heyəti, həmçinin Xorvatiya Parlamentində Nazirlər Kabinetinin iştirakı ilə keçirilən "Açıq sual" iclasını qonaq qismində izləyiblər. Xorvatiyanın Baş naziri Andrey Plenkoviç, Nazirlər Kabinetinin üzvləri, eləcə də Xorvatiya Parlamentinin deputatları Azərbaycan nümayəndə heyətini salamlayıblar.

Millət vəkillərimiz daha sonra Xorvatiya Parlamenti sədrinin müavini Davorko Vidoviç ilə görüşüb, bir sıra əhəmiyyətli mövzular üzrə fikir mübadiləsi aparıblar. Deputat Könül Nurullayeva çıxış edərək, hər iki xalqın paylaşdığı dərin dostluq və rəğbət hissləri ilə uyğunluq təşkil edən parlamentlərarası münasibətlərdən, dostluq qruplarının yaradılmasının tarixindən bəhs edib. Xorvatiya parlamentinin keçmiş sədrlərinin 2013 və 2014-cü ildə Azərbaycana, habelə V çağırış Milli Məclisin sədrinin 2014-cü ildə Xorvatiyaya etdiyi rəsmi səfərlərin önəmini qeyd edib.

Sonra Azərbaycan nümayəndə heyəti Xorvatiya-Azərbaycan parlamentlərarası dostluq qrupunun rəhbəri Maya Qrba-Buyeviç və qrupun üzvləri ilə görüşdə iştirak edib. Dostluq qrupları arasında may ayında keçirilən görüşdə Azərbaycan Respublikası və Xorvatiya Respublikası Parlamentləri arasında mövcud əlaqələrin daha da möhkəmləndirilməsi və şaxələndirilməsi istiqamətində irəli sürülən bir sıra mühüm təkliflər yenidən səsləndirilib. Təkliflər əsasən mədəniyyət, elm, gender bərabərliyi, gənclər siyasəti, idman sahələrinə aid olub.

Azərbaycan nümayəndə heyətinin üzvləri Xorvatiya Parlamentinin Avropa işləri Komitəsinin sədri Domaqoy Haydukoviç və Xarici siyasət Komitəsi sədrinin müavini Davor Ivo Stir ilə də görüşüblər. Görüş zamanı qeyd olunub ki, iki ölkə arasında diplomatik əlaqələr 1995-ci il yanvarın 26-da qurulub və o vaxtdan bəri ölkələrimiz arasında təhsil, mədəniyyət, iqtisadi tərəfdaşlıq, humanitar məsələlər, nəqliyyat və tranzit tərəfdaşlığı sahələrində əlaqələr dinamik şəkildə genişlənir. Millət vəkili Könül Nurullayeva çıxış edərək, Xorvatiyanın göstərdiyi siyasi dəstəyə və Qarabağ məsələsindəki mövqeyinə görə təşəkkürünü bildirib. Həmçinin vurğulayıb ki, 2 il əvvəl 44 gün davam edən müharibə nəticəsində Azərbaycan öz ərazilərinin Ermənistan tərəfindən işğalına son qoyaraq, ərazi bütövlüyünü bərpa edib. "Azad edilmiş ərazilərdə aparılan yenidənqurma və minalardan təmizləmə işlərində Xorvatiya şirkətləri də yaxından iştirak edir", - deyə K.Nurullayeva söyləyib.

Millət vəkili Eldar Quliyev də öz növbəsində diqqəti Qarabağ münaqişəsinin həllindən sonrakı vəziyyətə yönəldib. Aparılan bərpa-quruculuq işləri barədə məlumat verib. Eyni zamanda mina probleminə toxunaraq, Ermənistanın postmünaqişə dövründə də destruktiv siyasət yeritdiyini bildirib. Bu yanaşmanın bölgədə davamlı sülh və təhlükəsizliyə mane olduğunu vurğulayıb.

Milli Məclisin deputatları, eyni zamanda Xorvatiya Parlamentinin İqtisadiyyat komitəsinin sədri Zarko Tuşek ilə görüş keçiriblər. Görüşdə deputat Könül Nurullayeva bildirib ki, son iki ildə ölkələrimiz arasında ticarət dövriyyəsi 1,2 milyard dollardan çox olub. Azərbaycan və Xorvatiya hökumətləri arasında İqtisadi Əməkdaşlığın Təşviqi üzrə Birgə Komissiya 2013-cü ilin martında yaradılıb və bu günədək birgə komissiyanın iki iclası keçirilib. Millət vəkili, həmçinin yaxın gələcəkdə Birgə Hökumətlərarası Komissiyanın üçüncü iclasının təşkilinin iqtisadi əməkdaşlığın inkişafı baxımından çox faydalı olacağına dair əminliyini ifadə edib.

Qeyd edək ki, Azərbaycan nümayəndə heyətinin üzvləri Xorvatiyanın Turizm və idman naziri Nikolina Brnyak ilə də görüşüblər, iki ölkə arasındakı mövcud əməkdaşlıq əlaqələrinin daha da genişləndirilməsi istiqamətində müzakirələr aparıblar.

Paylaş:
447

Son xəbərlər

Salyan sakinindən 2 kiloqramdan artıq heroin götürülübBu gün, 14:22Fövqəladə Hallar Nazirliyi tərəfindən daha bir qanunsuz tikili sökülübBu gün, 13:59Deputat: “Dünyada pensiya yaşının azaldılması yox, artırılması müzakirə olunur”Bu gün, 13:45Növbəti köç karvanı Füzuliyə çatıb, mənzillərin açarları təqdim edilib - YENİLƏNİB 1Bu gün, 13:41Bu şəxslərin təhsil haqqını dövlət ödəyəcəkBu gün, 13:34“Əlavə kassasiya qaydasında verilən şikayətlər əksər hallarda təmin olunmur” - Vəkillərdən ŞƏRHBu gün, 13:20Deputatdan TƏKLİF: “Təcili tibbi yardım helikopterləri alınsın”Bu gün, 12:54Azərbaycan cəmiyyəti işğalda olan kəndlərin azad ediləcəyinə inanır? - SORĞUBu gün, 12:41Şənbə günü hava necə olacaq?Bu gün, 12:38Ramazan bayramı günlərində Bakı-Qəbələ qatarları hər gün hərəkətdə olacaqBu gün, 12:28Qızıl və gümüşün bahalaşması davam edirBu gün, 12:21İctimai-iaşə obyektlərinin sahiblərinə çağırışBu gün, 12:15“N” hərbi hissəsində komanda-qərargah təlimi keçirilib - FOTOBu gün, 12:14Siyavuş Novruzov: “Bəzi şəxslər Azərbaycanda da terrorun olmasını istəyirdi”Bu gün, 12:02Azərbaycanda ötən gün 50 kiloqramdan artıq narkotik aşkarlanıbBu gün, 11:51FHN: Ötən sutka 39 yanğına çıxış olub, 57 nəfər təxliyə edilibBu gün, 11:39Sahibə Qafarova iclasda erməni həmkarı ilə görüşündən danışdıBu gün, 11:29Azərbaycan Mərkəzi Bankının valyuta məzənnələriBu gün, 11:20Azərbaycanlı şagird Harvard Universitetinə qəbul olubBu gün, 11:18PAŞA Qrup şirkətləri tərəfindən Novruz bayramı ərəfəsində növbəti sosial aksiya keçirilib - FOTOBu gün, 11:09
Bütün xəbərlər