Qobustanda fermerlərə dəyən zərərə fgörə sığorta ödənişi olub

Azərbaycanda dövlət dəstəyi ilə tətbiq edilən aqrar sığorta mexanizmi çərçivəsində fermerlərə zərər ödənişləri davam etdirilir.

1news.az xəbər verir ki, Aqrar Sığorta Fondunun rəhbərliyi Qobustan rayonunda fermerlərlə görüşərək mart ayında baş verən fırtınadan dəyən zərərlə bağlı sığorta ödənişlərini təqdim ediblər.

Bu ilin mart ayında Qobustan rayonunda əsən güclü külək və yaranmış qum fırtınası rayonun əkin sahələrinə, xüsusilə taxıl zəmilərinə böyük zərər vurub. Hadisə rayondakı çoxsaylı fermer təsərrüfatlarını əhatə edib. Ərəbqədim, Nardaran, Qobustan, Qaradüzlü, Ərəbşahverdi, Xilmilli kəndlərində fiziki və hüquqi şəxslərə məxsus olan ümumilikdə 500 hektara yaxın sığortalanmış taxıl sahəsi qasırğadan zərər görüb. Aqrar sığorta ekspertləri tərəfindən araşdırma və qiymətləndirmə işləri aparıldıqdan sonra qanunvericiliyə uyğun olaraq zərər ödənişləri həyata keçirilir.

Aqrar Sığorta Fondu tərəfindən ilin sonunadək bitkiçilik təsərrüfatlarında baş verən hadisələrlə bağlı 3 mln manat zərər ödənişlərinin edilməsi gözlənilir ki, bu məbləğin 300000 manatı Qobustan rayonu üzrə sığortalananların payına düşür. Hazırda zərər ödənilməsi prosesi mərhələli şəkildə davam etdirilir. Bu gün əkin sahələri fırtınadan zərər çəkən 12 fermerə toplam 50000 AZN məbləğində sığorta ödənişi edilmişdir.

Aqrar Sığorta Fondunun İdarə Heyətinin üzvü Roman Əmircanov bildirib ki, əldə edilən nəticələr Azərbaycanda aqrar sığortaya tələbatın yüksək olmasının və böyük potensialın göstəricisidir: "Dövlət tərəfindən bu sahədə tətbiq edilən güzəşt mexanizmləri fermerlərə və şirkətlərə imkan verib ki, ciddi maliyyə yükü olmadan təsərrüfatlarını effektiv şəkildə sığortalasınlar. Dövlət tərəfindən fermerlərin subsidiyalarla dəstəklənməsi və ağrar sığorta mexanizminin özünü doğrultması kənd təsərrüfatını yüksək gəlirli sahəyə çevirir.

Qobustan rayonu DAİM-nin direktoru Həsənağa Hüseynov çıxışında bildirib ki, fermerlərin aqrar sığorta sisemindən faydalanması sevindiricidir və bu gün onlara təqdim edilən zərər ödənişlərindən sonra sığortalananların sayı daha artacaq və bu da öz növbəsində kənd təsərrüfatında fəaliyyətlərin davamlılığına dəstək olacaq.

Fermerlər etibarlı sığorta mexanizminin işə düşməsinin onların təsərrüfatını, gəlir və qazanclarının risklərdən qoruduğunu, bu mexanizmə inamı artırdığını bildiriblər. Və bütün fermerlərə öz təsərrüfatlarını sığortalamağı tövsiyyə ediblər.