“Ermənilər də sülh istəyir, sadəcə ara qarışdıranlar var” - Aqil Abbas

Xəbər verdiyimiz kimi, Qarabağın erməni ictimaiyyətinin nümayəndələrinə növbəti çağırış edilib.

Belə ki, Prezident Administrasiyası görüşün Bakıda keçirilməsi ilə bağlı ikinci dəfə təklif ünvanlayıb.

Martın 1-də Xocalı şəhərində keçirilmiş görüşün və martın 13-də təqdim edilmiş dəvətin davamı olaraq Qarabağın erməni ictimaiyyətinin nümayəndələrini reinteqrasiya, həmçinin Qarabağda infrastruktur layihələrinin icrası məsələlərinin müzakirəsi məqsədilə aprel ayının birinci həftəsi Bakı şəhərində görüşün keçirilməsini bir daha təklif edib.

Bəs, görəsən, Qarabağın erməni ictimaiyyəti bu təklifi necə dəyərləndirməlidir?, Azərbaycanın təkliflərinə müsbət cavab vermək Qarabağın erməni ictimaiyyətinə nələr qazandıracaq? Bu təklifləri Qarabağın erməni icması üçün növbəti bir şans adlandırmaq olarmı?

Məsələ ilə bağlı 1news.az saytına Milli Məclisin deputatı Aqil Abbas açıqlama verib. Deputatın sözlərinə görə, Ermənistan tərəfi də sülh tərəfdarıdır:

“Bu, ermənilərin xeyrinədir. Gəlib yaşayarlar lap yaxşı, Azərbaycanda azsaylı etnik xalqlar necə yaşayırsa, onlar da elə yaşaya bilərlər. Əgər gəlmək istəməsələr də Laçın yolu açıqdır. Azərbaycan sülh əlini uzadır. Ermənistan tərəfi bu fürsəti qaçırmamalı, addım atmalıdır. Ermənilər də sülh olmağını istəyir, sadəcə ara qarışdıranlar var. Rusiya, Fransa, ABŞ guya sülh olmasını istəyir? Biz Ermənistan tərəfinə jest edirik. Gəlsələr çox yaxşı, gəlməsələr də özləri bilər. Azərbaycan tərəfi təklif edir ki, buyurun, gəlin danışaq, aramızdakı problemi həll edək. Amma Ermənistan tərəfi artıq dəfələrlədir bizim bu jestimizi müsbət dəyərləndirmir. Bu onlar üçün çox böyük şansdır. Yaşamaq istəyirlərsə, gəlib yaşasınlar. İstəmirlərsə də bu şansdan istifadə edə bilmirlərsə, tək söz deyə bilərik “Yaxşı yol!””.