Türkiyə Avropa İttifaqı ilə vizasız rejimə keçə bilər

Avropa Komissiyasının başçısı Jan-Klod Yunker Türkiyənin bütün vacib şərtləri yerinə yetirəcəyi təqdirdə 2016-cı ilin payızınadək Avropa İttifaqı (Aİ) ilə vizasız rejimə keçə biləcəyini bildirib. Bu məsələ Aİ-Türkiyə sammiti çərçivəsində müzakirə edilib.

1news.az TACC informasiya agentliyinə istinadla xəbər verir ki, viza liberallaşdırılması readmissiya ilə bağlıdır.

Türkiyənin Baş naziri Əhməd Davudoğlu öz növbəsində Ankaranın 2016-cı ilin yay aylarında vizasız rejimə nail olmaq üçün Aİ ilə readmissiya (Aİ ölkələrindən çıxarılan vətəndaşlarının qəbulu) üzrə razılaşmanı yerinə yetirəcəyini deyib.

Onun sözlərinə görə, gələn ilin martında Aİ vizasız rejimə doğru irəliləyiş üzrə hesabat təqdim edəcək, iyul ayında isə Türkiyə razılaşmanın şərtlərini reallaşdırmağa başlayacaq. Bundan sonra Ankara viza rejiminin liberallaşmasında sürətli irəliləyişə ümid edir.

Sammitdə mühacir böhranının həlli məqsədilə Türkiyəyə 3 milyard avro ayrılması vəd olunub. Əhməd Davudoğlunun fikrincə, sammit ölkəsinin Aİ-yə üzvlük məsələsində də şanslarını artırır.

1news.az