Ermənistanın keçmiş müdafiə nazirinin müavini həbs olunub

Yerevan şəhəri Mərkəz və Nork-Maraş inzibati rayonları ümumi yurisdiksiya məhkəməsi “cinayətkar əməkdaşlığa qatılmaqda” ittiham olunan sabiq Ermənistan müdafiə nazirinin müavini Vahan Şirxanyan barəsində iki aylıq həbs qətimkan tədbiri seçib.

Sabiq müdafiə nazirinin müavini Yerevanda “silahlı mütəşəkkil qruplaşmanın zərərsizləşdirilməsi” cinayət işi çərçivəsində Ermənistan Milli Təhlükəsizlik Xidməti (MTX) tərəfindən ötən şənbə saxlanılıb.

MTX öz rəsmi saytında Vahan Şirxanyanın bu il noyabrın 25-də zərərsizləşdirildiyi bildirilən “cinayətkar qrupla əlaqədə” olduğu, “konkret rol” oynadığı və “konkret tapşırıqlar” yerinə yetirdiyi qeyd olunur.

Sözügedən “mütəşəkkil dəstənin” cinayət işi üzrə həbs olunanların dəqiq sayı məlum deyil, qeyri-rəsmi mənbələr 30-dan çox adamın həbs olunduğunu bildirirlər.

Vahan Şirxanyan Ermənistanda terror aktları hazırlamaqda şübhəli bilinən dəstənin başçısı, 16 il İspaniyada yaşadıqdan sonra 2015-ci ildə yenidən Yerevana qayıtmış 34 yaşlı Artur Vardanyanla tanışlığını inkar etmir, lakin özünü günahkar bilmir, jurnalistlərə Şirxanyanın vəkili Tiqran Ter-Yesayan deyib.

Bundan başqa, ailəsi erməni katolik dininə sitayiş edən Vahan Şirxanyanın “mütəşəkkil qruplaşma”nın cinayət işi üzrə həbs olunmuş Gümri erməni katolik kilsəsinin dini rəhbəri Anton Totoncyanla da yaxından tanış olduğunu etiraf edib.

Vahan Şirxanyanın 68 yaşı var. Müxtəlif illərdə o, Ermənistan hökuməti nəzdində mütəşəkkil cinayətkarlıqla mübarizə üzrə DİN şöbəsinə başçılıq edib, müdafiə, milli təhlükəsizlik və daxili işlər üzrə daimi parlament komissiyasının sədri olub.

1995-1999-cu illərdə Vahan Şirxanyan Ermənistan müdafiə nazirinin birinci müavini, baş nazir müavini vəzifələrində çalışıb.

1999-2000-ci illərdə Ermənistan hökumətində nazir vəzifəsində istehsalat infrastrukturlarının əlaqələndirilməsi ilə məşğul olub.

BBC